اسلام آباد (سٹاف رپورٹر)کنوینٗر ورلڈ مینارٹیز الا ئینس ، سابق وفاقی وزیراور نوبل پیس پرائز کے لئے نامزد امید وار جے سالک نے کہا ہے کہ نو منتخب حکومت ترجیحی بنیادوں پر اقوام متحدہ کے ساتھ اپنے معاہدے کی تجدید کرے۔ انہوں نے ان خیالات کا اظہار وطن عزیز واپسی پر نیشنل پریس کلب اسلام آباد کے سامنے منعقدہ ایک تقریب سے خطاب کے دوران کیا۔انہوں نے کہا کہ پاکستان واپسی کے بعد اس تقریب کا مقصدنہ صرف نو منتحب حکومت کا خیر مقدم ہے بلکہ حکومت کو اقلیتوں کے حوالے سے ان کی ذمہ داریوں کی یاد دہانی بھی ہے۔ جے سالک نے کہا ہے کہ یونائیٹڈ نیشن چونکہ اقلیتوں کے حقوق کے تحفظ کا ذمہ دار ہے ، اور ستمبر 1947 میں پاکستان بننے کے بعد سر ظفر اللہ خان نے بطور وزیر خارجہ یونائیٹڈ نیشن کے چارٹر پر دستخط کئے تھے اور اقلیتوں کے حقوق کی یقین دہانی کروائی تھی اس لئے ہم پابند ہیں کہ اقلیتوں کے حقوق کا تحفظ کریں۔ انہوں نے مزید کہا کہ یو این او کے ساتھ اس معاہدے کی تجدید کی ضرورت ہے اور نومنتخب حکومت یو این او کے ساتھ تجدید عہد کو بلا تاخیریقینی بنائے بلکہ ہر سال اس عہد کی تجدید کی ضرورت ہے ۔ یاد رہے کہ جے سالک اپنی اہلیہ مسز میری سالک کے ہمراہ امریکہ سے ایک ماہ کے دورے کے بعد وطن عزیز واپس پہنچ گئے ہیں ، وطن واپسی پر کارکنان کی جانب سے ان کا پرتپاک استقبال کرتے ہوئے نہایت خوشی کا اظہار کیا گیا۔کارکنان نے سیکرٹری یو این او اینٹونیو گٹرس کی تصاویر اور پلے کارڈز اٹھا رکھے تھے جن پر اقلیتوں کے حقوق سے متعلق نعرے درج تھے۔اس موقع پر کارکنان کی جانب سے جے سالک کو پھولوں کے گلدستے اور ہار بھی پیش کئے گئے۔