اسلام آباد(سٹاف رپورٹر)وفاقی سیکرٹری برائے وزارت نیشنل ہیلتھ سروسز ریگولیشنز اینڈ کوآرڈینیشن افتخار علی شلوانی نے فارما سیکٹر کی افزائش پر ٹیکنیکل ورکنگ گروپ کے افتتاحی اجلاس کی صدارت کی۔ اس ٹیکنیکل ورکنگ گروپ کا بنیادی مقصد پاکستان میں فارماسیوٹیکل سیکٹر کو درپیش موجودہ چیلنجز سے نمٹنا اور صنعت میں سرمایہ کاری اور برآمدات کو فروغ دینے کیلئے فوری اور طویل مدتی حل تیار کرنا ہے۔
اجلاس میں ڈرگ ریگولیٹری اتھارٹی آف پاکستان، نیشنل انسٹی ٹیوٹ آف ہیلتھ، پاکستان فارماسیوٹیکل مینوفیکچررز ایسوسی ایشن، فیڈرل بورڈ آف ریونیو اور بورڈ آف انویسٹمنٹ کے نمائندوں سمیت اہم اسٹیک ہولڈرز نے شرکت کی۔
سیکرٹری افتخار علی شلوانی نے وزارتِ قومی صحت کے زیر نگرانی میں ڈی ریگولیشن کے سنگ میل کو حاصل کرنے میں ہونے والی نمایاں پیش رفت پر روشنی ڈالی۔ انہوں نے اسلام آباد میں ہیلتھ سٹی کے قیام کیلئے وزارت کے عزم کا اعادہ کیا۔ ہیلتھ سٹی کا قیام صحت کی دیکھ بھال کا ایک جامع نظام جس میں ایک جدید ترین ہسپتال، تشخیصی لیبز، ایک میڈیکل ٹاور، ایک مرکز برائے طبی سیاحت، اور ایک فارماسیوٹیکل اکنامک زون شامل ہے۔ اس اقدام کا مقصد مقامی دواسازی کی پیداوار کو بڑھانا، پائیدار طریقوں کو فروغ دینا اور سازگار کاروباری ماحول پیدا کر کے غیر ملکی سرمایہ کاری کو فروغ دینا ہے۔
سیکرٹری شلوانی نے فارماسیوٹیکل مینوفیکچرنگ سیکٹر کو معیشت کیلئے انتہائی اہم قرار دیتے ہوئے مسابقتی مارکیٹ اور کاروبار کرنے میں آسانی کی ضرورت پر زور دیا۔ انہوں نے سرمایہ کاروں کی حوصلہ افزائی کی کہ وہ اس شعبے میں سرمایہ کاری کریں تاکہ نہ صرف مافیا کی اجارہ اداری توڑی جا سکے بلکہ ادوایات کی قیمتوں میں بھی نمایاں کمی کی جاسکے۔
سیکرٹری شلوانی نے فارماسیوٹیکل سیکٹر کو مراعات فراہم کرنےکی بات کی اور صنعت کے نمائندگان سے ضروری اور غیر ضروری ادویات کی قیمتوں کا تعین اور قیمتوں پر قابو پانے کے طریقہ کار پر بھی تجاویز طلب کی۔ انہوں نے پاکستانی فارماسیوٹیکل مصنوعات کی برآمدی امکانات کو بہتر بنانےکیلئے بین الاقوامی معیارات پر عمل پیرا ہونے کی اہمیت پر زور دیا اور صحت عامہ کو خطرے میں ڈالنے والی جعلی ادویات کے خلاف سخت اقدامات اٹھانے بنانےکیلئے وزارت کے عزم کا اعادہ کیا۔
وزارتِ قومی صحت دواسازی کی صنعت کی ترقی کے لیے ایک بہتر ماحول فراہم کرنے کے عزم کا اعادہ کرتی ہے جس سے ملک کی مجموعی صحت اور بہبود میں بہتری آئی گی۔
