لاہور: وزیراعلیٰ پنجاب مریم نواز کے احکامات کے بعد مختلف علاقوں میں پتنگ فروشوں اور پتنگ بازوں کی پکڑ دھکڑ کا سلسلہ جاری ہے۔

لاہور میں پولیس نے پتنگ بازی کیخلاف کارروائیاں کرتے ہوئے 1285 مقدمات درج کرکے 1330ملزمان گرفتار کرلیے۔

پولیس کے مطابق گرفتار ملزمان میں 1223 پتنگ باز، 95 پتنگ فروش اور 12 پتنگ ساز شامل ہیں۔

ملزمان کے قبضہ سے 19ہزار 700 سے زائد پتنگیں اور ڈور کی 1116 چرخیاں برآمد ہوئیں۔

پولیس کا کہنا ہے کہ پتنگ بازی کے خونی کھیل کی کسی صورت اجازت نہیں دی جا سکتی۔

حافظ آباد میں پولیس نے پتنگ فروشوں اور پتنگ بازوں کے خلاف آپریشن کیا، اور مختلف علاقوں میں 90 سے زائد مقدمات درج کرلیے۔

پولیس نے متعدد پتنگ فروش اور پتنگ باز گرفتار کرلیے ہیں۔ ملزمان سے سیکڑوں پتنگیں، ڈور کی چرخیاں اور دیگر سامان برآمد کرلیے۔

دوسری طرف پتوکی میں پولیس نے پتنگیں اور کیمیکل ڈور بنانے والے کارخانے پر چھاپہ مارا۔

چھاپے کے دوران سیکڑوں کی تعداد میں پتنگیں اور دیگر سامان برآمد کرلیں۔

پولیس نے کارخانہ کے مالک سمیت 3 پتنگ باز گرفتار کرکے مقدمات درج کرلیے۔