اسلام آباد(سٹاف رپورٹر)وفاقی وزیر برائے مواصلات، نجکاری و سرمایہ کاری بورڈ عبدالعلیم خان شمالی علاقہ جات کے دورے کے دوران سکردو پہنچے جہاں انہوں نے گلگت او رسکردو کو ملانے والی مین شاہرا پر لینڈ سلائیڈنگ سے ہونے والے نقصانات کا معائنہ کیا۔ وفاقی وزیر نے فرنٹینئر ورکس آرگنائزیشن کے ڈائریکٹر جنرل میجر جنرل عبدالسمیع اور وفاقی سیکرٹری مواصلات علی شیر محسود کے ہمراہ موجودہ صورتحال کا جائزہ لیا۔انہوں نے ہدایت کی کہ شہریوں اور سیاحوں کے لئے سکردو سے منسلک شاہراہوں پر سفر کو ہر قیمت پر محفوظ بنایا جائے اور گلگت اور سکردو کو ملانے والی مین شاہراہ پر زیادہ سے زیادہ توجہ مرکوز رکھی جائے۔ عبدالعلیم خان نے مزید کہا کہ پتھروں اور مٹی کے تودے گرنے سے بچاؤ اور جانی و مالی نقصان کے تحفظ کے لئے ہر ممکن اقدام یقینی بنایا جائے جس کے لئے ایف ڈبلیو او بھاری مشینری کے ہمراہ ان شاہراہوں کا سروے کرتی رہے اور کسی بھی نا گہانی صورتحال میں فوری سے فوری ریلیف کی سرگرمیاں فراہم کی جائیں تاکہ شہریوں کو مشکلات کا سامنا نہ کرنا پڑے۔
وفاقی وزیر مواصلات عبدالعلیم خان کو ایف ڈبلیو او کے ڈائریکٹر جنرل میجر جنرل عبدالسمیع اور وفاقی سیکرٹری مواصلات علی شیر محسود نے بریفنگ دی اور یقین دلایا کہ کم سے کم وقت میں شاہراہوں کی بحالی کو یقینی بناتے رہیں گے اور مستقبل میں شمالی علاقہ جات کے لئے زیادہ سے زیادہ مشینری اور ورک فورس تعینات کی جائے گی۔