اسلام آباد (نمائندہ خصوصی)سینیٹ سیکرٹریٹ میں تعینات ڈرائیورز کی ٹریننگ کے حوالے سے ایک سیشن کا انعقاد آج پاکستان انسٹیٹیوٹ آف پارلیمنٹری سروسز اسلام آباد میں کیا گیا۔ سیشن کا انعقادسینیٹ سیکرٹریٹ کی ٹرانسپورٹ برانچ کی زیر نگرانی اسلام آباد ٹریفک پولیس کے حکام نے کیا۔ ٹریننگ سیشن میں سینیٹ سیکرٹریٹ کے جوائنٹ سیکریٹری جمیل احمد کھوسو، پاکستان انسٹیٹیوٹ آف پارلیمنٹری سروسز کے ایگزیکٹو ڈائریکٹر محمد انور اور ایس ایس پی ٹریفک پولیس سرفراز ورک نے شرکت کی۔ ٹریننگ سیشن میں سینیٹ سیکرٹریٹ کے ڈرائیورز کو نئے ٹریفک قوانین اور حفاظتی انتظامات کے حوالے سے تفصیلی آگاہ کیا گیا۔ اس موقع پر جوائنٹ سیکریٹری جمیل احمد کھوسو نے اپنے تاثرات کا اظہار کرتے ہوئے کہا کہ محفوظ ڈرائیونگ سڑک پر مال و جان کی حفاظت کی لیے انتہائی اہم ہوتی ہے اور یہ کسی بھی مہذب قوم کے رویوں کی عکاسی کرتا ہے انہوں نے کہا سینیٹ سیکرٹریٹ میں تعینات ڈرائیورز پر محتاط اور محفوظ ڈرائیونگ اس لحاظ سے اور بھی اہم ہو جاتی ہے کہ وہ پاکستان کے ایوان بالا سے تعلق رکھتے ہیں اور سڑک پر ان کا کردار ان کے اس ادارے کی بھی عکاسی کرتا ہے انہوں نے کہا کہ یہ ہی وجہ ہے کہ سینیٹ سیکرٹریٹ اپنے ڈرائیورز حضرات کو ٹریفک قوانین سے متعلق آگاہ رکھنے کے لیے باقاعدگی سے ٹریننگ سیشنز کا انعقاد کرتا ہے اور آج کا ٹریننگ سیشن بھی اسی سلسلے کی ایک کڑی ہے۔ ٹریننگ سیشن میں چیف ٹریفک آفیسر سرفراز ورک اور انسٹیٹیوٹ آف پارلیمنٹری سروسز کے ایگزیکٹو ڈائریکٹر محمد انور اور ڈپٹی سیکرٹری سینیٹ سیکرٹریٹ مدثر شیر علی گوندل نے بھی اپنے اپنے خیالات کا اظہار کیا۔ ٹریننگ سیشن کے اختتام پر چیف ٹریفک آفیسر سرفراز ورک اور دیگر حکام کو جوائنٹ سیکریٹری جمیل احمد کھوسو اور ڈپٹی سیکرٹری سینیٹ مدثر شیر علی گوندل کی جانب سے اعزازی شیلڈز بھی پیش کی گئیں۔