اسلام آباد (سٹاف رپورٹر)پیپلز لیبر بیورو پاکستان کے انچارج چوہدری منظور احمد، پیپلز یونٹی پی آئی اے ایمپلائز کے صدر ہدایت اللہ و دیگر رہنماؤں نے جمعہ کے روزنیشنل پریس کلب اسلام آباد میں ایک پریس کانفرنس سے خطاب کرتے ہوئے کہا کہ پی آئی اے کسی کی ذاتی جاگیر نہیں بلکہ ملک کا اثاثہ ہے اور یہ ادارہ کل بھی منافع بخش تھا اور آج بھی منافع بخش اداریہ بن سکتا ہے۔ انہوں نے کہا کہ حکومت کے کچھ لوگوں کو پی آئی اے کو بیچنے کی بہت جلدی ہے ۔ انہوں نے سوال کیا کہ کیا پی آئی کے ملازمین کا موقف لیا گیا؟ یہ کہتے ہیں کہ نجکاری سے چیزیں سستی ہوں گی حالانکہ نجکاری سے مہنگائی میں اضافہ ہوتا ہے اور اداروں میں نجکاری کے بعد چھانٹی کا عمل شروع ہوجاتا ہے۔ چوہدری منظور نے کہا کہ پی آئی اے کی نجکاری کی انہیں جلدی کیا ہے اور یہ کیوں اور کس کو بیچنا چاہ رہے ہیں،انہیں قوم کو بتانا چاہیے کہ کیا یہ پی آئی اے کو کسی کو بیچ رہے ہیں یا خود خریدنا چاہتے ہیں۔ ان کی پی آئی اے کے اثاثوں پر نظر ہے ۔ انہوں نے کہا کہ یہ پی آئی اے کی نجکاری کرنا چاہتے ہیںاور کسی لاڈلے کو دینا چاہتے ہیں ہم اسکی پرزورمزاحمت کرتے ہیں۔ انہوں نے کہا کہ بجٹ کی آمد آمد ہے، مہنگائی کے تناسب سے ملازمین کی سو فیصد تنخواہیں بڑھائی جائیںکیونکہ پچھلے کئی سالوں سے ملازمین کی تنخواہیں اس تناسب سے نہیں بڑھائی گئیں۔ پیپلز یونٹی پی آئی اے ایمپلائز کے صدر ہدایت اللہ نے گفتگوکرتے ہوئے کہا کہ پی آئی اے کی نجکاری بالکل غلط کرہے۔ انہوں نے کہا کہ قانون کے مطابق یہ نجکاری کا اختیار کابینہ کے پاس نہیں بلکہ پارلیمنٹ کے پاس ہے اوراس کا باقاعدہ طریقہ کار ہوتا ہے ۔