گوجرانوالہ(بیورو رپورٹ)پاکستان مسلم لیگ ن علما مشائخ ونگ گوجرانوالہ ڈویژن کے صدر صاحبزادہ محمد آصف معصومی کی ڈویژنل جنرل سیکرٹری عمران میر کے ہمراہ صوبائی صدر ڈاکٹر مفتی انتخاب احمد نوری سے ملاقات، ڈاکٹر مفتی انتخاب احمد نوری نے صاحبزادہ محمد آصف معصومی کو گوجرانوالہ ڈویژن کا صدر بننے پر مبارکباد پیش کی۔اس موقع پر پارٹی میں علما مشائخ ونگ کو مزید فعال بنانے پر تبادلہ خیال کیا گیا۔ ڈاکٹر مفتی انتخاب احمد نوری نے کہا کہ پاکستان مسلم لیگ ن ملک کی ایسی واحد جماعت ہے جو تمام قومیت کے لوگوں کو ساتھ لیکر چلتی ہے اسی طرح اس جماعت کا علما و مشائخ ونگ بھی اسی طرز پر کام کر رہا ہے جس میں تمام مسالک کے علما کا گلدستہ سجایا گیاہے۔ ڈاکٹر مفتی انتخاب احمد نوری نے کہا کہ یہ اللہ پاک کا حکم بھی ہے کہ نیکی اور بھلائی کے کاموں میں ایک دوسرے کی مدد کرو ۔ اس وقت ملک جن بحرانوں سے دوچار ہے اور ان بحرانوں کے حل کیلئے ہم سب کو ملکر ایک دوسرے کی مدد کرتے ہوئے ملک کو ان مسائل سے نکالنا ہے۔ پاکستان کی تعمیر و ترقی میں علما و مشائخ کا کردار ہمیشہ سے ہی بڑا مثبت رہا ہے ۔ صاحبزادہ محمد آصف معصومی نے شکریہ ادا کرتے ہوئے کہا کہ پاکستان مسلم لیگ ن علما مشائخ ونگ میں شامل ہونے والے علما اور مشائخ انتہائی قابل اور دینی اور دنیاوی تعلیم سے ہم آہنگ ہیں۔ پارٹی کو ان کی خدمات سے فائدہ اٹھانا چاہیے ۔ یہ ہمارا عظیم اثاثہ ہیں۔ انشااللہ ہم علما و مشائخ ونگ کو مضبوط اور فعال بنائیں گے۔