اسلام آباد(بیورو رپورٹ ) بیلجیئم کے پاکستان میں سفیر”چارلس ڈیلوگن“نے ہلال احمر پاکستان کا دورہ کیا۔نیشنل ہید کوارٹرز پہنچنے پر ہلال احمر پاکستان کی جانب سے پرتپاک استقبال کرتے ہوئے گلدستہ پیش کیا گیا۔ہلال احمر پاکستان کے چیئرمین سردار شاہد احمد لغاری سے ملاقات میں پاکستان بیلجیئم دوطرفہ تعلقات،تعاون اور مستقبل میں مستحکم روابط سے متعلق تبادلہ خیال کیا گیا۔اس موقع پر چیئرمین ہلال احمرپاکستان سردار شاہد احمد لغاری نے ہلال احمر پاکستان کی انسانیت کے لئے خدمات کا احاطہ کرتے ہوئے ملک بھر میں اور باالخصوص2022 کے سیلاب متاثرین کے لئے ہلال احمر کی جانب سے فراہم کردہ سہولیات سے متعلق آگاہی دی۔چارلس ڈیلوگن نے ہلال احمر پاکستان اپنی آمد کو خوشگوار وزٹ قرار دیتے ہوئے نیک خواہشات کا بھی اظہار کیا۔انہوں سردار شاہد احمد لغاری کی قیادت میں ہلال احمر پاکستان کے قدرتی آفات و سانحات کے دوران متاثرہ لوگوں کے لئے اقدامات کو سراہا۔ انہوں نے اس امر کا بھی اظہار کیا کہ انسانیت کی بقا اور فلاح کے لئے بیلجیئم اپنا تعاون جاری رکھے گا۔سردار شاہد احمد لغاری نے چارلس ڈیلوگن کی پاکستان میں تعیناتی کے دوران خدمات کی تعریف کی انہیں پاک بیلجیئم تعلقات کو استحکام بخشنے، مستحکم روابط کے قیام،باہمی تعاون کے فروغ اور عالمی سطح پر پاکستان کا ساتھ دینے پر خراج تحسین پیش کیا۔ ملاقات کے بعد میڈیا سے گفتگو کرتے ہوئے چارلس ڈیلوگن نے ہلال احمر پاکستان کی انسانیت کے لئے خدمات اور سفارتی تعلقات کی مضبوطی کے لئے اقدامات کو سراہا۔انہوں نے کہا انسانیت سب سے مقدم ہے اسے زندہ رکھنے کے لئے ہر فرد کو کردار ادا کرنا چائیے۔ہلال احمر پاکستان کی خدمات میری نظر میں قابل تعریف اور تاریخی نظر میں اہمیت کی حامل ہیں۔انہوں نے ہلال احمر پاکستان کی لائبریری کا بھی دورہ کیا اور مہمانوں کی کتاب میں اپنے تاثرات قلمبند کئے۔بیلجیئم کے سفیر چارلس ڈیلوگن کو ہلال احمر پاکستان کے چیئرمین سردار شاہد احمد لغاری نے اپنی کتاب ”داستان عزم“ بھی پیش کی۔