گوجرانوالہ( بیورو رپورٹ)ڈسڑکٹ اینڈ سیشن جج گوجرانوالہ نے سادہ لوح مجبور خواتین لڑکیوں اور کنوارے رنڈوے مردوں کو شادی بیاہ رشتے وغیرہ کا جھانسہ دیکر لوگوں کو لوٹنے والے گروہ کے خلاف قانونی کاروائی شروع کردی ہے.یہ کاروائی تھانہ گرجاکھ کے شہری اقبال کی رٹ پٹیشن پر عمل میں لائی گئی ہے۔متاثرہ شہری کے وکیل محمد رفیق ڈھلم ایڈووکیٹ ہائی کورٹ نے عدالت کو بتایا کہ فاروق آباد محلہ احمد پورہ نزد مشن گیٹ گلی نمبر 3ضلع شیخوپورہ کے نوسر بازوں کے گروہ کی سرغنہ روبینہ عرف ننھی بیگم وغیرہ نے ان کے موکل اقبال وغیرہ کو شادی کا جھانسہ دیکر ساڑھے 6لاکھ روپے نقد اور 5تولے طلائی زیورات سے محروم کرکے ناقابل تلافی نقصان پہنچایا جبکہ بہت بڑا دھوکہ ،فراڈ نوسر بازی کی ہے اور بدستور سادہ لوح شہریوں کو لوٹ رہے ہیں ۔ان کے خلاف فوری قانونی کاروائی عمل میں لائی جائے ۔چنانچہ عدالت نے متذکرہ گروہ کے خلاف کاروائی کرتے ہوئے تھانہ گرجا کھ کو ملزمان کو پیش کرنے کی ہدایت جاری کردی ہے۔دریں اثنا سائل اقبال نے بتایا ہے کہ نوسر بازوں کے گروہ کی طرف سے انہیں سنگین نتائج کی دھمکیاں دی جارہی ہیں ،انہیں تحفظ فراہم کیا جائے ۔