اسلام آباد(آئی یم ایم)وفاقی وزیر نجکاری، سرمایہ کاری بورڈ اور مواصلات عبدالعلیم خان نے کہا ہے کہ جنوبی اور وسط ایشیائی ممالک کو باہم تجارتی اور مواصلاتی رابطوں کو فروغ دینا ہوگا جس کے لئے فضائی، ریل اور روڈ کے تینوں ذرائع آمد و رفت میں اضافہ ضروری ہے اور جس کیلئے درست سمت میں تیزی سے کام کرنا ہوگا۔اس امر کا اظہار وفاقی وزیر عبدالعلیم خان نے اپنی رہائشگاہ پر قازقستان کے سفیر یرزہان کستافن سے ہونے والی ملاقات میں گفتگو کرتے ہوئے کیا۔
وفاقی وزیرعبدالعلیم خان کا کہنا تھا کہ پاکستان تمام وسط ایشیائی ریاستوں سے دو طرفہ تجارت اور کاروبار کے فروغ کا خواہا ں ہے اور اس ضمن میں پاکستان میں سرمایہ کاری کیلئے خصوصی مراعات دی جا رہی ہیں۔عبدالعلیم خان نے قازقستان کے سفیر سے ہونے والی بات چیت کو مفید قرار دیتے ہوئے انہیں اپنے حالیہ دورہ تاجکستان سے آگاہ کیا جس میں وسط ایشیائی ممالک سے دو طرفہ تجارتی امور میں واضح پیش رفت ہو ئی ہے۔ قازقستان کے سفیر یرزہان کستافن نے وفاقی وزیر برائے مواصلات عبدالعلیم خان کو 12ملکوں کے ٹریڈ اینڈ لاجسٹک فورم میں شرکت کی دعو ت دی جس کا انعقاد 19اور20جولائی کو قازقستان کے شہر اکتاء میں ہونے جا رہا ہے اور جس میں سینٹرل و جنوبی ایشیا سے 12اہم ممالک شرکت کررہے ہیں۔ قازقستان کے سفیر یرزہان کستافن نے وفاقی وزیر عبدالعلیم خان کو اپنے وزیر ٹراسپورٹ مارات کرابوف کی طرف سے فورم میں شرکت کا دعوت نامہ دیا اور دو طرفہ تعلقات کے فروغ کی حکومت پاکستان کی پیشکش پر اظہار تشکر کیا۔ قازقستان کے سفیر یرزہان کستافن کا کہنا تھا کہ اُن کا ملک پاکستان میں سرمایہ کاری میں گہری دلچسپی رکھتا ہے اور انشاء اللہ جلد اس ضمن میں عملی پیشرفت کی جائے گی جس کیلئے دونوں ممالک کے مابین مواصلاتی رابطوں میں اضافہ ضروری ہے۔ وفاقی وزیر نجکاری، سرمایہ کاری بورڈ اور مواصلات عبدالعلیم خان اور قازقستان کے سفیر یرزہان کستافن کی ملاقات میں دونوں نے ایک دوسرے کا گرم جوشی سے خیر مقدم کیا اور باہمی دلچسپی کے مختلف امور پر تبادلہ خیال اور دونوں ممالک کے مابین پائے جانے والے یکساں مذہبی، ثقافتی اور تاریخی حوالوں پر بات چیت کی۔