اسلام آباد(آئی ایم ایم)سپیکر قومی اسمبلی سردار ایاز صادق نے کہا ہے کہ پاکستان اور جرمنی کے درمیان کثیر جہتی دوستانہ تعلقات ہیں اور دونوں ممالک اہم علاقائی اور بین الاقوامی امور پر یکساں موقف رکھتے ہیں۔انہوں نے پائیدار ترقی کے اہدف کے حصول کے لیے دونوں ممالک کے مابین پارلیمانی، ثقافتی، اقتصادی اور عوامی سطح پر رابطوں کو مزید مضبوط بنانے کی ضرورت پر زور دیا ہے۔ ان خیالات کا اظہار انہوں نے جرمنی کے پارلیمانی وفد سے ملاقات کے دوران کیا جس نے جمعرات کے روز پارلیمنٹ ہاؤس میں اسپیکر قومی اسمبلی سے ملاقات کی۔ ملاقات میں دوطرفہ تعلقات، اہم علاقائی اور عالمی امور پر تفصیلی تبادلہ خیال کیا گیا۔ملاقات میں پاکستان اور جرمنی کے مابین موجودہ دوطرفہ پارلیمانی و سفارتی تعلقات پر اطمینان کا اظہار کیا اور باہمی مفادات کیلئے تعاون کو مزید وسعت دینے کے عزم کا اعادہ کیا گیا۔
پارلیمانی تعلقات پر تبادلہ خیال کرتے ہوئے سپیکر نے دوطرفہ تعلقات کو مضبوط بنانے میں پارلیمانی سفارت کاری کی اہمیت کو اجاگر کیا۔انہوں نے دونوں ممالک کی پارلیمانوں میں رابطوں کو فروغ دینے کیلئے پارلیمانی دوستی گروپوں کے درمیان تعاون کو مزید وسعت دینے اور پارلیمانی وفود کے تبادلوں کی ضرورت زور دیا۔
دوطرفہ اور یورپی تناظر میں تجارتی اور اقتصادی تعاون پر تبادلہ خیال کرتے ہوئے سپیکر نے کہا کہ موجودہ حکومت پاکستان میں اقتصادی اور تجارتی سرگرمیوں کے لیے سازگار ماحول اور دوست ممالک کو سرمایہ کاری کے لیے مواقع فراہم کرنے کیلئے حکومت ترجیحی بنیادوں پر اقدامات اٹھا رہی ہے۔
وفد کے اراکین نے پاکستان میں پرتپاک استقبال اور جرمنی اور اس کی عوام کے لیے خیر سگالی کے جذبات کے اظہار پر اسپیکر قومی اسمبلی کا شکریہ ادا کیا۔ انہوں نے کہا کہ جرمنی پاکستان کو ایک اہم علاقائی اقتصادی شراکت دار سمجھتا ہے اور پارلیمانی اور ثقافتی تبادلوں کو فروغ دینے کے علاوہ باہمی دلچسپی کے تمام شعبوں میں روابط کو مزید مستحکم بنانے کے لیے پرعزم ہے۔ جرمن وفد جرمنی کی پارلیمنٹ کے اراکین مسٹر مائیکل مولر، مسٹر کرسٹوف شمڈ اور محترمہ ڈیریا ترک ناچبور کے علاؤہ جرمنی کے پارلیمانی حکام شامل تھے۔
