اسلام آباد(آئی ایم ایم)پاکستان اور آذربائیجان نے توانائی، تجارت، رابطے، دفاع اور عوام سے عوام کے روابط کے شعبوں سمیت باہمی سود مند تعاون کو مزید وسعت دینے کے عزم کا اعادہ کیا ہے۔ اس عزم کا اعادہ جمعہ کو ایوان صدر میں صدر مملکت آصف علی زرداری اور پاکستان کے دورے پر آئے ہوئے آذربائیجان کے صدر الہام علیوف کے درمیان ملاقات میں کیا گیا۔ ایوان صدر کے پریس ونگ سے جاری بیان کے مطابق صدر مملکت نے آذربائیجان کے صدر کا خیرمقدم کرتے ہوئے کہا کہ دونوں ممالک کے درمیان بہترین تعلقات ہیں اور باہمی دلچسپی کے مختلف شعبوں میں تعلقات کو مزید بہتر بنانے کی وسیع گنجائش موجود ہے۔
انہوں نے دوطرفہ تعلقات کو مستحکم کرنے کے لیے پاکستان اور آذربائیجان کے عوام اور تاجروں کے درمیان مزید باقاعدہ روابط کی ضرورت پر زور دیا۔ انہوں نے گوادر بندرگاہ کی اہمیت کو اجاگر کرتے ہوئے کہا کہ وسطی ایشیائی ممالک اور آذربائیجان اس سے علاقائی تجارت، روابط اور سیاحت کو فروغ دینے کے علاوہ خطے میں مشترکہ اقتصادی خوشحالی لانے کے لیے استفادہ کر سکتے ہیں۔ صدر مملکت نے پاکستان اور آذربائیجان کے درمیان مفاہمت کی یادداشتوں پر دستخط کا خیرمقدم کیا۔ انہوں نے کہا کہ مفاہمت کی یادداشتوں سے تجارت ، سیاحت، کان کنی ، معدنیات، سائنس و ٹیکنالوجی، ثقافت، قانون اور انصاف کے شعبوں میں دوطرفہ تعاون کو نئی تحریک ملے گی۔
صدر آصف علی زرداری نے کہا کہ مشرقی ممالک میں دنیا کو خوشحالی کی طرف لے جانے کی صلاحیت موجود ہے، پاکستان وسطی ایشیائی ممالک اور آذربائیجان کے ساتھ پائیدار اور نتیجہ خیز روابط قائم کرنا چاہتا ہے۔
اس موقع پر آذربائیجان کے صدر الہام علیوف نے کہا کہ پاکستان اور آذربائیجان کے درمیان اچھے عوامی روابط ہیں، دونوں ممالک کو اقتصادی تعلقات بڑھانے کیلئے کاروباری تعلقات کو فروغ دینا ہوگا۔
الہام علیوف نے کہا کہ پاکستان اور آذربائیجان قابل ِتجدید توانائی کے شعبے میں مل کر کام کرنے کے امکانات تلاش کرسکتے ہیں۔ بعد ازاں صدر مملکت نے ایوان صدر میں صدر الہام علیوف اور ان کے وفد کے اعزاز میں ظہرانہ دیا۔ ظہرانے میں وزیراعظم محمد شہباز شریف، وفاقی وزراء، ارکان پارلیمنٹ، سفارتکاروں اور صحافیوں نے بھی شرکت کی۔