اسلام آباد( آئی ایم ایم) صدر استحکام پاکستان پارٹی اور وفاقی وزیر عبدالعلیم خان نے یوم عاشورہ پر اپنے پیغام میں کہا ہے کہ شہادتِ سیدنا امام حسین ؓ اُمت مسلمہ کے لیے عظیم اور آفاقی درس کا باعث ہے اور یہ واقعہ ہمیں باطل کے سامنے ڈٹ جانے اور حق بات کہنے کاعملی طور پر ہمت اور حوصلہ دیتا ہے۔ انہوں نے کہا کہ نواسہ رسولؐ نے کربلا میں جرأت و شجاعت کی وہ تاریخ رقم کی جس پر انسانیت ہمیشہ فخرکرتی رہے گی کیونکہ اسوہ حضرت امام حسین ؓ ہر کسی کے لئے مشعل راہ ہے۔ عبدالعلیم خان نے مزید کہا کہ عاشورہ ہمیں سکھاتاہے کہ عظیم مقاصد کی خاطر قربانیاں بھی بڑی دینا پڑتی ہیں اورہمیں آج کے دن باہمی اتحاد، یگانگت اور بھائی چارے کاعہد کرنا ہوگا۔ عبدالعلیم خان نے دعا کی کہ اللہ تعالیٰ ہمیں اسوہ امام حسین ؓ پر عمل پیرا ہونے کی توفیق دے۔

دریں اثناء استحکام پاکستان پارٹی پنجاب کے صدر رانا نذیر احمد، ایم پی اے وجنرل سیکرٹری شعیب صدیقی اور مرکزی ایڈیشنل جنرل سیکرٹری میاں خالد محمود نے بھی اہل بیعت کے حضور ہدیہ سلام پیش کرتے ہوئے پیغام دیا ہے کہ ہمیں شہدائے کربلا کی قربانیوں سے رہنمائی حاصل کرنے کی ضرورت ہے۔ خانوادہ رسول کا اپنی زندگیوں کو اسلام کی بقا کے لئے قربان کرنا رضائے الہٰی کے حصول کی بہترین اور روشن مثال ہے۔ صوبائی صدر رانا نذیر احمد خان نے شہدائے کرب و بلا کو خراج عقیدت پیش کرتے ہوئے کہا کہ امام حسین اور ان کے ساتھیوں نے میدان کربلا میں مشرف با شہادت ہو کر انسانیت کو سرخرو کیا ہے۔انسانیت آج بھی خاندان رسالت مآب کی قربانیوں کے سامنے سر نگوں ہے۔ جنرل سیکرٹری و ایم پی اے شعیب صدیقی نے کہا کہ بلا شبہ ”اسلام زندہ ہوتا ہے ہر کربلا کے بعد ”کا فلسفہ ہماری عملی زندگی کو بہتری کے لئے ابدی رہنمائی کرتا ہے جبکہ واقعہ کربلا سے ہمیں یہی درس ملتا ہے کہ اللہ کی رضا پر راضی ہونا ہی اصل بندگی ہے۔مرکزی ایڈشنل جنرل سیکرٹری میاں خالد محمود نے اپنے پیغام میں کہا کہ انسانیت ہمیشہ نواسہ رسول کی اسلام کیلئے لازوال قربانی کی قرض خواہ رہے گی۔ سبط نبی کے طرز زندگی کو اپنا کر ہم راہ حق پا سکتے ہیں۔ انہوں نے کہا کہ آج کے دن ہم سب کو اخوت، بھائی چارے اور مذہبی رواداری کوفروغ دینا ہوگاتا کہ ہم ملک میں نظام امن قائم کر سکیں۔