اسلام آباد (آئی ایم ایم) پاکستان پیپلز پارٹی کے چیئرمین بلاول بھٹو زرداری نے جاری مون سون بارشوں کے دوران ملک کے مختلف حصوں میں جانی و مالی نقصان پر گہرے دکھ و افسوس کا اظہار کیا ہے۔ میڈیا سیل بلاول ہاوَس کی جانب سے جاری کردہ پریس رلیز کے مطابق، پی پی پی چیئرمین نے کہا کہ حالیہ بارشوں کے دوران سب سے زیادہ جانی نقصان صوبہ خیبرپختونخواہ میں ہوا ہے، صرف ضلع کوہاٹ میں بارش 10 افراد جاں بحق ہوئے ہیں۔

انہوں نے کہا کہ سخت موسم اور مواصلاتی سہولیات کی کمی کی وجہ سے خیبرپختونخواہ کے دور دراز علاقوں کے بہت سارے واقعات رپورٹ نہیں ہورہے۔ انہوں نے افسوس کا اظہار کرتے ہوئے کہا کہ صوبہ خیبرپختونخواہ میں بارش متاثرین بے یارومددگار ہیں، اور حکومت کہیں نظر نہیں آرہی۔ پنجاب میں بارشوں کی صورتحال پر بات کرتے ہوئے چیئرمین بلاول بھٹو زرداری نے کہا کہ مجھے امید ہے کہ صوبائی حکومت بارش متاثرین کی بلاتفریق و بروقت امداد کو یقینی بنائے گی۔ انہوں نے پاکستان پیپلز پارٹی کے تمام ارکانِ اسمبلی کو ہدایات جاری کرتے ہوئے کہا کہ وہ بارشوں کے دوران اپنے حلقوں میں موجود رہیں۔ سندھ اور بلوچستان میں وزراء، ارکان اسمبلی اور بلدیاتی ذمہ داران امدادی کاموں کی نگرانی کریں اور یہ یقینی بنایا جائے کہ کوئی ایک متاثر بھی حکومتی امداد سے محروم نہ رہے۔ چیئرمین بلاول بھٹو زرداری نے زور دیا کہ بارش زدہ علاقوں میں جیالے (پارٹی کارکنان) ضرورت مند افراد اور متاثرین کی مدد کیلئے آگے آئیں اور متاثریں کی مدد کے لئے متحرک ہوجائیں۔