اسلام آباد(آئی ایم ایم)صدر مملکت آصف علی زرداری نے مسلم امہ کو درپیش چیلنجز پر قابو پانے کیلئے مسلم ممالک کے درمیان مزید اتحاد اور تعاون کی ضرورت پر زور دیتے ہوئے کہا ہے کہ پاکستان اور سعودی عرب کے درمیان مشترکہ عقیدے، تاریخ اور بھائی چارے پر مبنی بہترین تعلقات ہیں۔ ایوان صدر کے پریس ونگ سے جاری بیان کے مطابق صدر مملکت نے ان خیالات کا اظہار مسجد نبوی ﷺ کے امام ڈاکٹر صلاح بن محمد سے گفتگو کرتے ہوئے کیا جنہوں نے جمعرات کو یہاں ایوان صدر میں ان سے ملاقات کی۔
انہوں نے دوطرفہ تعلقات مزید فروغ دینے کے پاکستان کے عزم کا اعادہ کرتے ہوئے کہا کہ دونوں برادر ممالک کے درمیان تعلقات مزید مستحکم ہو رہے ہیں۔ صدر مملکت نے کہا کہ دونوں برادر ممالک کو مزید قریب لانے کے لیے ثقافتی اور عوام کے درمیان تعلقات فروغ دینے کی ضرورت ہے۔ صدر مملکت نے کہا کہ سعودی عرب قریبی دوست ہے، پاکستان ہمیشہ سعودی عرب کے ساتھ کھڑا رہے گا۔
مسجد ِنبوی ﷺ کے امام ڈاکٹر صلاح بن محمد نے کہا کہ سعودی عرب کی قیادت اور عوام پاکستان کے ساتھ تعلقات کو بہت اہمیت دیتے ہیں، پاکستان اور سعودی عرب کی مضبوط شراکت داری ہے۔ انہوں نے کہا کہ دونوں ممالک کو عالم اسلام کو درپیش چیلنجز سے نمٹنے کے لیے مل کر کام کرنا چاہیے۔ ڈاکٹر صلاح بن محمد نے سعودی عرب کی ترقی میں پاکستانی کمیونٹی کے کردار کو سراہا اور کہا کہ شہزادہ محمد بن سلمان کی شروع کردہ اصلاحات سے سعودی عرب میں مزید ترقی اور خوشحالی آئے گی۔ صدر مملکت نے شہزادہ محمد بن سلمان کی جرات مندانہ اور دور اندیش قیادت کو سراہتے ہوئے کہا کہ امید ہے کہ مسجد نبوی ﷺ کے امام کے دورے سے دوطرفہ تعلقات کو مزید فروغ ملے گا۔ مسجد نبوی ﷺ کے امام نے اس موقع پر پاکستان کی سلامتی اور خوشحالی کے لیے دعا کی۔
