اسلام آباد(آئی ایم ایم) این ڈی ایم اے کے نیشنل ایمرجنسی آپریشن سینٹر (این ای او سی) نے26تا28 اگست 2024 کے دوران پنجاب اورخیبر پختونخواہ میں گرج چمک کے ساتھ بارش کی پیش گوئی کی ہے۔موسلادھار بارش کے باعث اسلام آباد/راولپنڈی سمیت پنجاب کے متعدد اضلاع بشمول گوجرانوالہ، لاہور، شیخوپورہ، قصور، سیالکوٹ، سرگودھا، فیصل آباد اور ملتان کے نشیبی علاقوں میں سیلابی صورتحال پیدا ہو سکتی ہے علاوہ ازیں خیبر پختونخواہ میں سوات، دیر، مردان، کوہستان، بونیر، گلیات، پشاور، صوابی، کوہاٹ، کرک، لکی مروت، مانسہرہ، بٹگرام، کوہاٹ، اورکزئی، خیبر، ڈیرہ اسماعیل خان خان کےاضلاع کے بڑے ندی نالوں میں بہاؤ میں اضافہ متوقع ہے جبکہ نشیبی علاقوں میں طغیانی متوقع ہے۔ موسلا دھار بارش/آندھی اور بجلی گرنے سے روزمرہ کے معمولات متاثر ہو سکتے ہیں، کچے مقانات کی چھتوں دیواروں،بجلی کے کھمبوں، بل بورڈ، گاڑیوں اور سولر پینل وغیرہ کو نقصان پہنچنے کا خدشہ ہے۔
این ڈی ایم اے تمام متعلقہ اداروں کو ہدایات جاری کی ہیں وہ سیلاب اور تیز بارشوں کے باعث پیدا ہونے والی ممکنہ ہنگامی صورتحال سے نمٹنے کے لیے ضروری احتیاطی تدابیر اختیار کریں۔ ایمرجنسی رسپانس ٹیموں کو الرٹ کرنے کے ساتھ ساتھ کسی بھی ممکنہ ہنگامی صورتحال پر فوری رسپانس کو یقینی بنانے کے لیے وسائل کی دستیابی کو یقینی بنانے کی بھی ہدایت کی ہے۔ عوام سے التماس ہے سیلابی صورتحال سے بچاؤ کے لیے احتیاطی تدابیر اپنائیں۔سیاح اور مسافر حضرات شدید بارشوں کے دوران ان علاقوں میں سفر سے گریز کریں۔
این ڈی ایم اے نے Pak NDMA Disaster Alert ایپلیکیشن متعارف کرادی ہے جو گوگل پلے سٹور اورiOS ایپ سٹور پر موجود ہے تاکہ عوام کوبر وقت الرٹس، ایڈوائزریز اور خطرے سے متعلق مخصوص گائیڈ لائنز، عوامی آگاہی کے پیغامات اوردیگر ضروری معلومات کی فراہمی ممکن بنائی جا سکے۔
