اسلام آباد(آئی ایم ایم)صدر مملکت آصف علی زرداری کا نیشنل نیوز پیپرریڈرشپ ڈے کے موقع پر پیغام۔اخبارات کے قارئین کے عالمی دن پر آل پاکستان نیوز پیپرز سوسائٹی (APNS) کو دلی مبارک باد پیش کرتا ہوں۔اخبارات سیاسی شعوربڑھانے اور شہریوں کو ان کے حقوق اور ذمے داریوں سے آگاہ کرنے میں اہم کردار ادا کرتے ہیں۔اخبارات خبریں فراہم کرنے کا ایک اہم ذریعہ ہیں۔
صدر مملکت نے کہا کہ اس خاص موقع پر اخبارات سے گزارش ہے کہ وہ ہمارے معاشرے میں اخلاقی اور جمہوری اقدار کو فروغ دیں۔ اخبارات کے ذریعے لوگوں میں سماجی و اقتصادی مسائل سے آگاہی کے ساتھ ساتھ برداشت، رواداری، بین المذاہب ہم آہنگی، حب الوطنی اور انسانی حقوق کے احترام کو بھی فروغ دینا چاہیے۔اس تیز رفتار ڈیجیٹل دور میں اخبارات کا کردار غلط معلومات اور جعلی خبریں روکنے کے حوالے سے بہت اہمیت اختیا رکر گیا ہے۔ اخبارات کو جدید انفارمیشن ٹیکنالوجی کا استعمال کرتے ہوئے جعلی خبروں کی حوصلہ شکنی کے لیے درست اور حقائق پر مبنی خبریں فراہم کرنے کی ضرورت ہے۔ اخبارات جھوٹی معلومات کے پھیلاؤ کو روکنے اور حقائق پر مبنی خبروں کو فروغ دینے میں اہم کردار ادا کریں۔ ذمے دار پریس خبروں کی رپورٹنگ میں درستگی، انصاف پسندی اور توازن کے اعلیٰ ترین معیار کو برقراررکھتا ہے۔
انہوں نے کہا کہ ذمے دار پریس پسماندہ آوازوں کو سننے کے لیے ایک پلیٹ فارم بھی فراہم کرتا ہے۔پریس کو اہم مسائل پر لوگوں کی رہنمائی اور آگاہی کے لیے تعمیری کردار ادا کرنا چاہیے۔ہم قارئین کے اس دن پر ایک آزاد اور ذمہ دار پریس کی حمایت کا اعادہ کرتے ہیں جو جمہوری نظام کی کامیابی کے ساتھ ساتھ قومی اور بین الاقوامی اہمیت کے مسائل پر رائے عامہ کی تشکیل کے لیے راہ ہموار کرے.
