اسلام آباد (آئی ایم ایم)پاکستان اور سعودی عرب نے معیشت، زراعت، کان کنی اور انفارمیشن ٹیکنالوجی جیسے اہم شعبوں میں تعاون بڑھانے کے عزم کا اعادہ کرتے ہوئے خطے اور عالم اسلام کے لیے ایک خوشحال اور پرامن مستقبل کی تعمیر کے لیے مل کر کام کرنے کی ضرورت پر زور دیا ہے۔ اس بات کا اظہار جمعرات کو یہاں ایوان صدر میں صدر مملکت آصف علی زرداری اور سعودی وزیر سرمایہ کاری خالد بن عبدالعزیز الفالح کی قیادت میں پاکستان کے دورے پر آئے ہوئے سعودی عرب کے وفد کے درمیان ملاقات کے دوران کیا گیا۔ صدر مملکت نے وفد کا خیرمقدم کرتے ہوئے پاکستان اور سعودی عرب کے درمیان دیرینہ اور ہر آزمائش میں پوری اترنے والی دوستی کا ذکر کیا۔ انہوں نے دوستانہ تعلقات کو طویل المدتی سٹریٹجک اور اقتصادی شراکت داری میں تبدیل کرنے کی پاکستان کی خواہش کا اظہار کیا اور اس بات پر زور دیا کہ اس طرح کا تعاون دونوں برادر ممالک کو مزید قریب لائے گا۔ صدر مملکت نے خادم الحرمین الشریفین شاہ سلمان بن عبدالعزیز آل سعود کے لیے پاکستان کے گہرے احترام اور سعودی عرب کے ساتھ یکجہتی کے لیے پاکستان کے غیر متزلزل عزم کا اعادہ کیا۔

صدر مملکت نے ولی عہد اور سعودی عرب کے وزیر اعظم محمد بن سلمان آل سعود کی دور اندیش قیادت کی بھی تعریف کی۔ انہوں نے وژن 2030 کے تحت سعودی عرب کی جانب سے کی جانے والی قابل ذکر پیش رفت کو سراہا اور مشکل وقت میں سعودی عرب کی جانب سے پاکستان کے ساتھ مسلسل تعاون پر شکریہ ادا کیا ۔ صدر مملکت نے کہا کہ سعودی عرب کی ترقی اور خوشحالی کا مشاہدہ کرکے سے انہیں خوشی ہورہی ہے۔ اس موقع پر سعودی وزیر سرمایہ کاری خالد بن عبدالعزیز الفالح نے کہا کہ سعودی عرب پاکستان کی تزویراتی جغرافیائی اہمیت، قدرتی وسائل اور قابل تجدید توانائی کی صلاحیت کو تسلیم کرتا ہے۔ انہوں نے کہا کہ سعودی عرب نے پاکستان کے انفراسٹرکچر اور کان کنی کے شعبوں میں سرمایہ کاری کرنے کا منصوبہ بنایا ہے اور اس سلسلے میں ان کا وفد مختلف شعبوں میں 25 معاہدوں پر دستخط کرے گا جس سے دونوں برادر ممالک کے درمیان اقتصادی تعاون کو فروغ ملے گا۔

انہوں نے امید ظاہر کی کہ معاہدوں پر دستخط سے دونوں ممالک کے درمیان اقتصادی تعاون کے نئے دور کا آغاز ہوگا۔ فریقین نے زراعت اور انفارمیشن ٹیکنالوجی کے شعبوں میں تعاون بڑھانے پر زور دیا۔ اس موقع پر وزیر پٹرولیم سینیٹر مصدق مسعود ملک، وزیر تجارت جام کمال خان، وزیر برائے نجکاری عبدالعلیم خان، وزیر داخلہ سینیٹر سید محسن رضا نقوی، وزیر مذہبی امور وبین المذاہب ہم آہنگی چوہدری سالک حسین اور سینیٹر سلیم مانڈوی والا کے علاوہ سعودی سفیر نواف سعید المالکی بھی موجود تھے۔\932