کراچی(آئی ایم ایم)گورنر خیبرپختونخوا فیصل کریم کنڈی نے کراچی ایکسپو سینٹر میں منعقدہ 5ویں بین الاقوامی ٹیکسٹائل اور چمڑے کی نمائش میں شرکت کی۔ اس اہم تقریب میں وزیراعلیٰ سندھ سید مراد علی شاہ اور وفاقی وزیر تجارت جام کمال خان بھی موجود تھے۔تقریب کے دوران ملکی اور غیر ملکی نمائندوں نے ٹیکسٹائل اور چمڑے کی صنعت میں جدید رجحانات اور تکنیکی ترقی پر روشنی ڈالی۔ گورنر خیبرپختونخوا فیصل کریم کنڈی نے نمائش کے مختلف اسٹالز کا دورہ کیا اور ملکی معیشت میں ٹیکسٹائل اور چمڑے کی صنعت کی اہمیت کو اجاگر کیا۔گورنر فیصل کریم کنڈی نے اس موقع پر خطاب کرتے ہوئے کہا کہ پاکستان کی ٹیکسٹائل اور چمڑے کی صنعت عالمی سطح پر نمایاں مقام رکھتی ہے اور اس کی ترقی ملکی معیشت کے لیے ناگزیر ہے۔ انہوں نے کہا کہ خیبرپختونخوا کی صنعتوں کو بھی ایسے مواقعوں سے فائدہ اٹھانا چاہیے تاکہ وہ عالمی منڈی میں اپنے قدم جما سکیں۔

انہوں نے کہا کہ خیبرپختونخوا میں ٹیکسٹائل اور چمڑے کی صنعت کے نہ صرف ہنر مند موجود ہیں بلکہ اس حوالہ سے سرمایہ کاری کے وسیع مواقع بھی دستیاب ہیں ملک بھر میں ان صنعتوں سے وابسطہ افراد کو دعوت دیتا ہوں کہ وہ خیبرپختونخوا کی جانب اس حوالہ سے توجہ مبذول کریں انہوں نے کہا کہ تاجکستان اور خیبرپختونخوا کے درمیان صنعت کو فروغ دینے کے حوالہ سے مختلف تجاویز پر ہم کام کررہے ہیں۔ وزیراعلیٰ سندھ سید مراد علی شاہ اور وفاقی وزیر تجارت جام کمال خان نے بھی تقریب سے خطاب کیا اور ملکی برآمدات میں اضافے اور صنعتی ترقی کے لیے حکومتی اقدامات پر روشنی ڈالی۔