گوجرانوالہ( آئی ایم ایم)سربراہ پاکستان سنی تحریک محمد شاداب رضا نقشبندی نے کہاہے کہ مہنگائی نے غریب عوام کا جینادشوارکردیا،قوم کو نان ایشوزپرالجھانے کی بجائے حکومت بجلی، گیس اورپٹرول کی قیمتوں میں کمی کرے، تنخواہ داروں پر سے ناجائز ٹیکس ہٹا کر جاگیرداروں پر ٹیکس لگایا جائے، حالیہ ایس سی او سربراہی کانفرنس میں کشمیراور فلسطین کازپر گفتگو نہ کرنا افسوسناک ہے، فلسطین کے حق کے لیے آواز اٹھانا پوری امت کا فرض ہے،مسلمان حکمرانوں کی خاموشی مجرمانہ ہے، پاکستانی حکومت اسلامی سربراہی کانفرنس یا کم از کم وزرائے خارجہ کا اجلاس بلائے جو اہل فلسطین کو صہیونی مظالم سے نجات دلانے کے لیے واضح اور دوٹوک موقف اختیار کرتے ہوئے عملی اقدامات اٹھائے،بھارت سے دوستی کی پینگیں بڑھانے کی بجائے حکومت کشمیر کاز کے لیے جاندار موقف اپنائے،کشمیریوں کے خون پر بھارت سے کسی قسم کے تعلقات استوار نہیں ہوسکتے۔27 اکتوبر خطہ کشمیر کی تاریخ کا سیاہ دن ہے۔ آج سے سات دہائیاں قبل بھارتی افواج نے عوامی امنگوں اور جمہوری اقدار کی خلاف ورزی کرتے ہوئے کشمیر پر قبضہ جمایا۔
کشمیری عوام اس وقت سے لے کر آج تک بھارتی تسلط سے آزادی کے لیے جدوجہد کررہے ہیں، پاکستان سنی تحریک27اکتوبر کو ملک گیر سطح پر ” یوم سیاہ “کے طور پرمنائیگی،کشمیریوں سے یکجہتی اور بھارت کے غاصبانہ رویئے کے خلاف ملک بھر میں ریلیاں،مظاہرے اور سمینار کا انعقاد کیا جائیگا،پاکستان کے عوام کے دل کشمیریوں کے ساتھ دھڑکتے ہیں بھارتی تسلط کے خلاف ہر فورم پر آواز بلند کرینگے، آئین سے انحراف ملک وقوم کے لیے ہمیشہ مشکلات لاتا ہے، آئین پاکستان ایک متفقہ دستاویز ہے اس کو متنازع بنانے سے گریز کیا جائے،ملک کو ترقی وخوشحالی کی راہ پر گامزن کرنے کے لیے ملک میں قرآن و سنت کی بالادستی کو یقینی بناناہوگا۔
26ویں آئینی ترمیم میں سود کے خاتمہ سے متعلق شق کی شمولیت کاخیرمقدم کرتے ہیں تاہم حکومت جب تک سود کے خاتمے کا واضح روڈ میپ نہیں دیتی ان کا یہ عمل محض عوام کو مطمئن کرنے کی سیاسی چال ہی گردانا جائے گا، مبارک ثانی کیس میں سپریم کورٹ کے فیصلے کی تحسین کرتے ہیں، حکومت قادیانی سازشوں کو روکنے کے لیے انھیں آئین کا پابند بنائے۔ان خیالات کااظہارانہوں نے ایمن آبا دی گیٹ نزد شیرانوالہ باغ سٹی آفس کی افتتاحی تقریب سے خطاب کرتے ہوئے کیا۔
