پشاور(آئی ایم ایم)گورنر خیبرپختونخوا فیصل کریم کنڈی سے خیبرپختونخوا فٹبال ایسوسی ایشن کے وفد نے معروف فٹبالر شاہد شنواری کی قیادت میں ملاقات کی۔ ملاقات میں صوبے میں کھیلوں کے فروغ، نوجوانوں کی فلاح و بہبود، اور صوبائی سطح پر کھیلوں کے مقابلوں کے انعقاد پر تفصیلی گفتگو کی گئی۔ گورنر نے وفد کا استقبال کرتے ہوئے کھیلوں کی اہمیت اور نوجوانوں کی جسمانی و ذہنی صحت پر ان کے مثبت اثرات پر روشنی ڈالی۔گورنر فیصل کریم کنڈی نے کہا کہ خیبرپختونخوا کی سرزمین میں بے پناہ ٹیلنٹ موجود ہے اور اس ٹیلنٹ کو مناسب پلیٹ فارم مہیا کرنا حکومت کی ترجیحات میں شامل ہے۔ انہوں نے کہا کہ کھیلوں کے فروغ سے نہ صرف نوجوانوں کی توانائی مثبت سمت میں استعمال ہوگی بلکہ ان میں خوداعتمادی اور مسابقتی صلاحیتیں بھی پیدا ہوں گی۔
گورنر نے صوبے میں کھیلوں کی سرگرمیوں کو مزید فعال بنانے کے عزم کا اظہار کیا اور کہا کہ حکومت مختلف کھیلوں کے مقابلوں کی میزبانی اور انعقاد کے لیے ہر ممکن تعاون فراہم کرے گی، ملاقات میں صوبے میں “گورنر گولڈ فٹبال کپ” کی تجویز پیش کی گئی، جس کا گورنر خیبرپختونخوا نے خیرمقدم کیا۔ انہوں نے اس اقدام کو صوبے کے نوجوانوں کے لیے ایک شاندار موقع قرار دیا جس سے انہیں اپنی صلاحیتوں کو نکھارنے اور قومی سطح پر اپنی شناخت بنانے میں مدد ملے گی۔ فیصل کریم کنڈی نے صوبائی فٹبال ایسوسی ایشن کے وفد کو یقین دلایا کہ گورنر گولڈ فٹبال کپ کے مقابلے جلد ہی شروع کیے جائیں گے اور حکومت ان مقابلوں کے کامیاب انعقاد کے لیے تمام ضروری اقدامات کرے گی۔کھلاڑیوں کی حوصلہ افزائی صرف یہی نہیں کہ انکو مقابلے میں شرکت کے لیئے رقم دی جائے بلکہ اسکی تربیت اور دیگر مراحل میں بھی اسکی سرپرستی ضروری ہے ہم نے جن کھلاڑیوں کی سرپرستی کی انہوں نے ملک وقوم کا نام روشن کیا۔
انہوں نے کہا کہ صرف گورنر گولڈ کپ ہی نہیں مستقبل میں صدر گولڈ کپ کا بھی انعقاد کیا جائے گا اور اس ضمن میں درپیش مشکلات کو حل کرنے میں بھرپور تعاون کیا جائے گا ، معروف فٹبالر اور وفد کے سربراہ شاہد شنواری اور وفد کے دیگر ارکان نے کھیلوں کے فروغ اور نوجوانوں کی حوصلہ افزائی کے حوالے سے گورنر کے خیالات کو سراہا اور اس بات پر خوشی کا اظہار کیا کہ حکومت اس معاملے میں سنجیدہ ہے۔ انہوں نے کہا کہ اس طرح کے مقابلے نہ صرف کھیلوں کو فروغ دیں گے بلکہ صوبے کی مثبت تصویر کو بھی اجاگر کریں گے۔
