گوجرانوالہ( آئی ایم ایم)آل پاکستان فیڈریشن آف یونائیٹڈ ٹریڈ یونینز(APFUTU)کے جنرل سیکرٹری ضیا سید، صدر ثمینہ اشرف کامریڈ کی قیادت میں وفد نے سہہ فریقی لیبر کانفرنس میں شرکت کی اور وفاقی وزیر برائے اوورسیز پاکستانی و افرادی قوت چوہدری سالک حسین سے ملاقات بھی کی۔ اس موقع پر وفاقی وزیر چوہدری سالک حسین نے ضیا سید کی قیادت میں ملاقات کرنے والے وفد سے بات چیت کرتے ہوئے کہا کہ 15 سال کے بعد انٹرنیشنل لیبر آرگنائزیشن( آئی ایل او)کے ساتھ مل کر دو روزہ سہہ فریقی لیبر کانفرنس کا انعقاد کیا گیا ۔ جس میں لیبر ویلفئیر کے کاموں کا جائزہ لیا گیا۔ ہم سب کو مل کر لیبر کے حقوق کے لیے کام کرنے کی اشد ضرورت ہے، ہماری کوشش ہو گی کہ ہر سال سہہ فریقی لیبر کانفرنس کا انعقاد کیا جائے تا کہ لیبر کو درپیش مسائل کو حل کرنے کے لیے اداروں کی کارکردگی بہتر بنائی جا سکے ۔

انہوں نے کہا کہ ہنر مند افراد کی ڈیمانڈ میں اضافہ ہوا ہے اور حکومت نے سعودی عرب کی 20 کمپنیوں کو آئندہ سال ہنر مند افراد کی فراہمی کے لیے معاہدے بھی کیے ہیں۔ جبکہ سعودی عرب اور دوبئی نے سیروسیاحت کے ویزا پر آ کر مختلف روزگار سے وابستہ ہونے کی کوشش کرنے والے افراد کے لیے قوانین میں سختی کی ہے۔ ایک سوال کے جواب میں انہوں نے کہا کہ چوہدری شجاعت حسین کی ہمیشہ کوشش رہی ہے کہ ملکی اور خاندانی معاملات کو مثبت انداز میں حل کیا جائے ۔ مسلم لیگ ق نے ملکی اور عوامی مفاد کو سامنے رکھ کر بہتر فیصلے کیے ہیں۔ عازمین حج کو بہتر سہولیات فراہم کی جائیں گی ۔ دو لاکھ روپے ایڈوانس ادا کر کے درخواست جمع کروائی جا سکتی ہے باقی چار لاکھ روپے نام کی منظوری کے بعد ادا کرنے کی سہولت بھی میسر ہے۔ حج پالیسی کا اعلان کر دیا گیا۔