راولپنڈی (آئی ایم ایم) کنٹرولر امتحانات تعلیمی بورڈ، راولپنڈی تنویر اصغر اعوان نے امتحان انٹرمیڈیٹ سیکنڈ اینول 2024ء کے سلسلہ میں گورنمنٹ گریجویٹ کالج سیٹلائٹ ٹاؤن راولپنڈی،گورنمنٹ ہائی سکول ڈی اے وی کالج روڈ راولپنڈی، گورنمنٹ ایسوی ایٹ کالج فار ویمن ایف بلاک سیٹلائٹ ٹاؤن راولپنڈی، گورنمنٹ اسلامیہ ہائی سکول نمبر 4 لیاقت روڈ راولپنڈی،گورنمنٹ ایسوی ایٹ کالج فار ویمن پولیس اسٹیشن روڈ صدر راولپنڈی، گورنمنٹ ایسوی ایٹ کامرس کالج سنی بنک مری کے امتحانی مراکز کا دورہ کیا۔دورے کے بعد گفتگو کرتے ہوئے انہوں نے کہا امتحان انٹرمیڈیٹ سیکنڈ اینول 2024ء اختتام پذیر ہو گیا۔ شفاف امتحان کے انعقاد کیلئے حکومتِ پنجاب کی زیرو ٹالرنس پالیسی کو اپنایا اور چیئرمین تعلیمی بورڈ راولپنڈی محمد عدنان خان کی سربراہی میں بوٹی مافیا کو لگام ڈالنے میں کامیاب رہے۔ امتحان کے انعقاد میں ضلع انتظامیہ کے افسران ڈائریکٹر کالجز، تمام اضلاع کے سی ای اوز کے تعاون کے مشکور ہیں۔ جن کے تعاون کی بدولت شفاف اور پر امن ماحول میں امتحان انٹرمیڈیٹ سیکنڈ اینول 2024 منعقد ہوا۔
تمام امتحانی عملے بشمول ڈسٹری بیوٹر انسپکٹر، ریذیڈینٹ انسپکٹر، موبائل انسپکٹرز، سپرنٹنڈنٹ اور ڈپٹی سپرنٹنڈنٹ نے اپنی ڈیوٹی بااحسن طریقے سے سرانجام دی۔ جس پر وہ تمام امتحانی عملہ مبارکباد کا مستحق ہے۔ میں اُمید کرتا ہوں کہ آمدہ امتحان میٹرک و انٹر میڈیٹ فرسٹ اینول 2025ء کے انتظامات کو بھی فول پروف بنانے کیلئے ان تمام کا تعاون اسی طرز پر حاصل رہے گا۔
آخر میں انہوں نے کہا کہ وزیر اعلیٰ پنجاب مریم نواز کے ویژن اور صوبائی وزیر ہائیر ایجوکیشن ڈیپارٹمنٹ رانا سکندر حیات کی ہدایت کی روشنی میں میرٹ اور شفافیت کو مدِ نظر رکھتے ہوئے امتحان میٹرک و انٹرمیڈیٹ فرسٹ اینول 2025ء منعقد کروایا جائے گا اور جدید تقاضوں کے مطابق امتحانی نظام میں بہتری اور جدت لائی جائے گی ۔
