اسلام آباد(آئی ایم ایم)اسلام آباد چیمبر آف کامرس اینڈ انڈسٹری کے صدر ناصر منصور قریشی نے پاکستان کے موجودہ سیاسی بحران سے نمٹنے کے لیے بات چیت کی اہمیت پر زور دیا ہے۔ انہوں نے سیاسی قیادت پر زور دیا ہے کہ وہ کشیدگی کو کم کرنے اور سیاسی استحکام اور اقتصادی ترقی دونوں کے لیے ایک مستحکم ماحول پیدا کرے۔
صدر قریشی نے تمام متعلقہ اسٹیک ہولڈرز کو شامل کرکے سیاسی استحکام کو برقرار رکھنے کی حکومت کی ذمہ داری کو اجاگر کیا ا ور خبردار کیا کہ جاری سیاسی عدم استحکام، غیر یقینی صورتحال، سیکورٹی خدشات اور بڑھتی ہوئی کاروباری لاگت مقامی صنعت کاروں کو بیرون ملک منتقل ہونے پر مجبور کر رہے ہیں جس کے نتیجے میں ملازمتیں ختم ہو رہی ہیں اور سرمایہ کاری کم ہو رہی ہے۔مزید برآں انہوں نے بیوروکریسی کی نااہلیوں پر تنقید کی جو سرمایہ کاری میں تاخیر کا سبب بنتی ہیں۔ انہوں نے توانائی کی بلند قیمتوں، غیر معقول ٹیکسوں، اور خاص طور پر چھوٹے اور درمیانے درجے کے کاروباری اداروں کے لیے ناہموار کاروباری میدان پر بھی تشویش کا اظہار کیا۔
ان مسائل کو حل کرنے کے لیے انہوں نے حکومت پر زور دیا ہے کہ وہ مراعات ، ضوابط کو آسان بنا کر، اور مالیات تک رسائی کو بڑھا کر نجی شعبے کی ترقی کو فروغ دے سکتی ہے۔صدر قریشی نے سرمایہ کاروں کے اعتماد کو بحال کرنے اور پائیدار اقتصادی ترقی کو فروغ دینے کے لیے طویل مدتی پالیسی استحکام کی اہمیت پر بھی زور دیا۔
انہوں نے نشاندہی کی کہ پالیسی میں بار بار تبدیلیوں اور حکومت کی طرف سے واضح سمت کی غیر موجودگی نے ایک غیر مو افق کاروباری ماحول پیدا کیا ہے۔ سرمایہ کاری اور ترقی کے لیے سازگار ماحول کو فروغ دینے کے لیے انہوں نے مستقل اقتصادی پالیسی سازی پر زور دیا۔ مزید برآں انہوں نے حکومت پر زور دیا کہ وہ کاروبار کرنے میں آسانی ، بنیادی ڈھانچے کے چیلنجوں سے نمٹنے اور مسابقتی اور لچکدار معیشت کی تعمیر کے لیے انسانی سرمائے کی ترقی کو ترجیح دینے پر توجہ دے۔
