اسلام آباد(آئی ایم ایم)اسلام آباد چیمبر آف کامرس اینڈ انڈسٹری (آئی سی سی آئی) کے صدر ناصر منصور قریشی نے کاروبار کرنے میں آسانی کے لیے اور ملک کی اقتصادی ترقی میں معاونت کے لیے مقامی تاجر برادری کو درپیش چیلنجز کو حل کرنے کے اپنے عزم کا اعادہ کیا ہے ۔ ہفتہ کو چیمبر کا دورہ کرنے والے کاروباری رہنماؤں سے ملاقات میں صدر قریشی نے کاروباری برادری اور سرکاری محکموں کے درمیان بہتر تعلقات کو فروغ دینے کی اہمیت پر زور دیا ا ور دونوں فریقوں کے درمیان خلیج کو ختم کرنے اور کاروبار کو ہموار کرنے کے لیے ضروری سہولیات کی فراہمی کو یقینی بنانے کے لیے چیمبر کی کوششوں کو اجاگر کیا۔
کاروباری رہنماؤں نے سیکیورٹی، صفائی، فیڈرل بورڈ آف ریونیو (ایف بی آر) کی جانب سے بےتحاشا ٹیکسوں اور کیپٹل ڈیولپمنٹ اتھارٹی (سی ڈی اے) کی جانب سے عائد کردہ مقامی ٹیکسوں پر تشویش کا اظہار کیا، جو ان کے خیال میں سرمایہ کاری کی حوصلہ شکنی کر رہے ہیں۔ جواب میں صدر قریشی نے یقین دلایا کہ آئی سی سی آئی مقامی صنعت کے بنیادی ڈھانچے کو بہتر بنا کر اور برآمد کے لیے ویلیو ایڈڈ مصنوعات کو فروغ دے کر غیر ملکی سرمایہ کاری کو راغب کرنے پر کام کر رہا ہے۔
صدر قریشی نے یہ امید بھی ظاہر کی کہ سی ڈی اے کے چیئرمین اتھارٹی سے متعلق خدشات کو دور کرنے کے لیے کاروباری رہنماؤں کے ساتھ براہ راست بات چیت کی تجویز کا مثبت جواب دیں گے۔ مزید برآں انہوں نے کاروباری برادری کو رہائش کے سنگین مسائل کا اعتراف کیا اور اس سلسلے میں ایک ہاؤسنگ سوسائٹی کے لیے چیمبر کی کوششوں پر بھی روشنی ڈالی ۔
سینئر نائب صدر عبدالرحمٰن صدیقی نے آئندہ رمضان فیسٹیول کی تیاریوں کے بارے میں اپ ڈیٹس شیئر کیں، جسے آئی سی سی آئی دارالحکومت کے مختلف کاروباری مراکز میں منعقد کرے گا تاکہ تاجروں اور صارفین دونوں کو فائدہ پہنچے۔نائب صدر ناصر محمود چوہدری نے ان چیلنجز کے حل کے لیے ایک طاقتور آواز پیدا کرنے کے لیے کمیونٹی کے اندر اتحاد کی اہمیت پر زور دیا۔
