اسلام آباد( سہیل ملک سے ) سماجی تنظیم ایس او ایس فاؤنڈیشن کے زیر اہتمام انسانی حقوق کے عالمی دن کے موقع پر ایچ نائن اسلام آباد میں آگاہی واک کا انعقاد کیا گیا۔ جس میں بچوں، نوجوانوں اور مختلف شعبہ ہائے زندگی سے تعلق رکھنے والےافراد نے کثیر تعداد میں شرکت کی۔ شرکاء نے پُرجوش انداز میں پلے کارڈز اور بینرز اٹھارکھے تھے، جن میں اقوام متحدہ کے انسانی حقوق کے چارٹر کے عالمگیر نفاذ کا مطالبہ کیا گیاتھا۔
ایس او ایس فاؤنڈیشن کے ڈائریکٹر عبدالسلام نے شرکا سے خطاب کرتے ہوئے کہا کہ امن، مساوات اور بنیادی انسانی حقوق ہر انسان کا پیدائشی حق ہے۔ رنگ، نسل، زبان اور مذہب کے نام پر تفریق سے معاشرے میں انتشار پیدا ہوتا ہے۔ انہوں نے عالمی طاقتوں پر زور دیا کہ وہ عالمی سطح پراقوام متحدہ کے انسانی حقوق کے ڈیکلریشن کے مطابق ان حقوق کو یقینی بنانے کی ذمہ داری لیں اور انسانی حقوق کے معیار کو برقرار رکھنے کے لیے قومی اور بین الاقوامی سطح پربھرپور کردار ادا کریں۔
انہوں نے مزید کہا کہ بدقسمتی سے پاکستان میں کروڑوں بچے غذا، صحت اور تعلیم جیسے بنیادی حقوق سے محروم ہے، محفوظ اور صحت مند ماحول، بنیادی تعلیم، اور ہر بچے کے لیے آگے بڑھنے کے مساوی مواقع کی فراہمی وقت کی ضرورت ہے۔ انہوں نے حکومت سے مطالبہ کیا کہ ملک میں ہر بچے کے حقوق کو یقینی بنانے کے لئے عملی اقدامات کیے جائیں۔ انہوں نے فلسطینی عوام بالخصوص خواتین اور بچوں کی حالت زار، ظلم و بربریت اور انسانی حقوق کی پامالی پرعالمی رہنماؤں سے اپنا بھرپور کردار ادا کرنے اور فلسطین میں فوری جنگ بندی کا مطالبہ کیا۔
پروفیسرز حضرت علی، نعمان شاکر، لالہ رخ، اور سعدیہ عامر نے خطاب کرتے ہوئے اس بات پر زور دیا کہ پاکستان میں بہت سے لوگ اپنے بنیادی حقوق سے ناواقف ہیں۔ انہوں نے عوام کو آگاہ کرنے کے لیے ایک آگاہی مہم چلانے پر زور دیا، انہیں آواز بلند کرنے اور حکام پر انسانی حقوق کے چارٹر کو قومی اور عالمی سطح پر نافذ کرنے کے لیے دباؤ ڈالنے کی ترغیب دی۔ #
SOS فاؤنڈیشن ایک غیر منافع بخش فلاحی تنظیم ہے جو عالمی اور قومی سطح پر انسانی حقوق، مساوات اور امن کو فروغ دینے کے لیے کام کرتا ہے۔ تعلیم اور آگاہی پر توجہ کے ساتھ، فاؤنڈیشن افراد کو اپنے حقوق کے لیے کھڑے ہونے اور معاشرے میں مثبت تبدیلی لانے کے لیے بااختیار بنانے کی کوشش کرتی ہے۔
مزید پڑھیں: مسلم لیگ(ن) عام انتخابات بھاری اکثریت سے جیتے گی،حنیف عباسی
