اسلام آباد(وسیم بٹ )دعوۃ اکیڈمی کے زیر اہتمام پاک افواج (آرمی، نیوی اور ایئر فورس) کے افسران کے لیے 39ویں ہیومن ریسورس ڈویلپمنٹ کورس کے شرکاء کے ایک وفد نے بین الاقوامی اسلامی یونیورسٹی کے نیو کیمپس کا دورہ کیا۔
کورس کے شرکاء میں افواج پاکستان کے افسران شامل تھے جنہیں دعوہ اکیڈمی کے اس ایک ماہ طویل کورس میں شامل کیا گیا ہے۔ وفد کی قیادت انچارج ٹریننگ ڈیپارٹمنٹ ڈاکٹر عبدالفرید بروہی کر رہے تھے۔ اس موقع پر انچارج پروٹوکول اینڈ پبلک ریلیشنز ناصر فرید بھی موجود تھے۔
وفد سے بات کرتے ہوئے نائب صدر ایڈمنسٹریشن اینڈ فنانس/ اکیڈمکس پروفیسر ڈاکٹر عبدالرحمٰن نے افواج پاکستان کی خدمات کو سراہا۔ انہوں نے کہا کہ افواج پاکستان قوم کا فخر ہیں۔
انہوں نے اس بات کو بھی سراہا کہ دعوۃ اکیڈمی اسلامی واقفیت کے اہم کورسز کا اہتمام کر رہی ہے۔ انہوں نے یونیورسٹی کے وژن، اس کی تاریخ اور مستقبل کے مقاصد کو واضح کیا۔ انہوں نے یونیورسٹی کی ترقی کے وژن کو بھی شیئر کیا اور یونیورسٹی کے اکیڈمک ایکسیلنس کے لیے اٹھائے گئے تازہ ترین اقدامات سے آگاہ کیا۔ انہوں نے صدر جامعہ ڈاکٹر ھذال حمود العتیبی کے وژن کا خصوصی زکر کیا کہ ان کی ہدایات کے مطابق یونیورسٹی معاشرے کی خدمت اور اسلام کی حقیقی تصویر کو پھیلانے پر پوری توجہ مرکوز کر رہی ہے۔ انہوں نے پیغام پاکستان کے ذریعے امن کو برقرار رکھنے اور اسلامو فوبیا کے خلاف جنگ میں جامعہ کے کردار کا بھی ذکر کیا۔
ماہر تعلیم کے طور پر اپنے تجربے کا زکر کرتے ہوئے، ڈاکٹر عبدالرحمٰن نے شرکاء کو معاشرے کی تعمیر میں اعلیٰ تعلیمی اداروں کے کردار اور تعلیم کے ذریعے طرز عمل میں تبدیلی کی اہمیت کے بارے میں روشنی ڈالی۔ انہوں نے نوجوانوں کے ذہنوں میں اسلامی افکار کے فروغ اور ہماری روزمرہ کی زندگی کے معمولات میں دین سے رہنمائی کی اہمیت پر بھی روشنی ڈالی۔
شرکاء نے یونیورسٹی کی فیکلٹیز، ڈگری پروگرامز، تربیتی اور تحقیقی منصوبوں میں گہری دلچسپی لی جبکہ انہوں نے دعوہ اکیڈمی کے کورس کو اپنی زندگی کی سب سے تعمیری سرگرمیوں میں سے ایک قرار دیا۔ بعد ازاں وفد نے یونیورسٹی کی مرکزی لائبریری کا بھی دورہ کیا۔
