اسلام آباد (آئی ایم ایم)پاکستان کرکٹ بورڈ نے آج تصدیق کی ہے کہ اسلام آباد کلب آئندہ ماہ سری لنکا اے اور پاکستان شاہینز کے درمیان پانچ میچوں کی ریڈ اور وائٹ بال سیریز کی میزبانی کرے گا۔سری لنکا اے اپنے پہلے دورۂ پاکستان میں 11 سے 21 نومبر تک دو چار روزہ میچ کھیلے گی ۔ اس کے بعد 25، 27 اور 29 نومبر کو پچاس اوورز کے تین ون ڈے میچوں کی سیریز کھیلی جائے گی۔سری لنکا اے کی ٹیم 7 نومبر کو اسلام آباد پہنچے گی اور تین روز کی پریکٹس کے بعد وہ 11 نومبر سے شروع ہونے والے پہلے چار روزہ میچ میں شاہینز کے مقابل ہوگی۔

دونوں چار روزہ میچ صبح ساڑھے نو بجے شروع ہونگے جبکہ ون ڈے میچز دوپہر دو بجے شروع ہونگے۔پی سی بی اپنے نوجوان کرکٹرز کی صلاحیتوں پر توجہ جاری رکھے ہوئے ہے اور شاہینز تین ماہ میں اپنی دوسری ہوم سیریز کھیلے گی ۔ اگست میں بنگلہ دیش اے نے اسلام آباد میں دو چار روزہ اور تین ون ڈے میچوں کی سیریز کھیلی تھی۔اس سال ہوم سیریز کے علاوہ پاکستان شاہینز نے ڈارون آسٹریلیا میں بنگلہ دیش اے کے خلاف دو چار روزہ میچوں کے علاوہ دو ون ڈے میچز اور پھر ٹاپ اینڈ ٹی ٹوئنٹی سیریز میں بھی حصہ لیا تھا۔ اس نے حال ہی میں مسقط میں ٹی ٹوئنٹی ایمرجنگ ایشیا کپ میں بھی حصہ لیا ہے۔

سری لنکا اے کے میچوں کا شیڈول:
7 نومبر اسلام آباد آمد
11-14 نومبر پہلا چار روزہ میچ بمقابلہ پاکستان شاہینز اسلام آباد کلب
18-21 نومبر دوسرا چار روزہ میچ بمقابلہ پاکستان شاہینز اسلام آباد کلب
25 نومبر – پہلا 50 اوورز میچ بمقابلہ پاکستان شاہینز اسلام آباد کلب
27 نومبر – دوسرا 50 اوورز میچ بمقابلہ پاکستان شاہینز اسلام آباد کلب
29 نومبر۔ تیسرا اوورز میچ بمقابلہ پاکستان شاہینز۔ اسلام آباد کلب ۔