اسلام آباد(وسیم بٹ)نیشنل ہائی وے اتھارٹی کے چیئرمین ارشد مجید مہمند نے کہا ہے کہ ہماری کوشش ہے کہ این ایچ اے کے زیر انتظام قومی شاہراہوں سے متعلق جاری تعمیراتی منصوبے عالمی معیار کے مطابق بروقت مکمل ہوں، وہ این ایچ اے ہیڈ کوارٹرز میں منعقدہ ای کچہری میں شہریوں کی طرف سے موصول ہونے والے سوالوں کے جوابات دے رہے تھے، فیسبُک کے ذریعے ملک کے مختلف علاقوں کی عوام نے ای کچہری میں شرکت کی اوراپنے سوالات ، تاثرات اور شکایات کے ذریعے این ایچ اے کی کارکردگی بہتر کرنے میں دلچسپی کا اظہار کیا۔ اکثر شرکأ کی جانب سے سوشل میڈیا کے ذریعے این ایچ اے کے اعلی حکام کی عوام تک رسائ کے اقدام کو بے حد سراہا گیا- اس موقع پر این ایچ اے کے متعلقہ ممبران بھی موجود تھے جبکہ تعمیراتی کاموں کے حوالہ سے مختلف سوالات کے جوابات دینے میں ممبر (پی پی پی) نوید اقبال واہلہ اور ممبر(ای سی) نسیم خٹک نے چیئرمین این ایچ اے کی معاونت کی، بعض سڑکوں کی خراب صورتحال کے حوالہ سے عوامی شکایات کا ازالہ کرتے ہوئے چیئرمین این ایچ اے نے مذکورہ سڑکوں کی فوری مرمت کے احکامات صادر کئے، ارشد مجید مہمند نے چند ایک منصوبوں کی تکمیل میں ہونیوالی تاخیر کے وجوہات پر بھی روشنی ڈالی۔ چیئرمین این ایچ اے ارشد مجید مہمند کے مطابق قومی شاہراہوں کو ہمہ وقت ٹریفک کیلئے بحال رکھنا این ایچ اے کی اولین ذمہ داری ہے کیونکہ قومی شاہراہیں ہی عوام کی آمد و رفت، تجارتی سرگرمیوں، زرعی اجناس کی ترسیل اور استحکام معیشت کا واحد ذریعہ ہیں، چیئرمین این ایچ اے نے شکایت کنندگان اور دیگر رابطہ کرنے والوں کو یقین دلایا کہ ان کی شکایات کے ازالہ کے لئے ان کے فون نمبرز پر متعلقہ افسران رابطہ کر کے انہیں تمام تر صورتحال سے آگاہ کریں گے تاکہ ان کی حطُ الامکان تسلی ہو سکے۔