اسلام آباد(سٹاف رپورٹر) وفاقی سیکرٹری مذہبی امور ذوالفقار حیدر نے سعودی سفیر نواف بن سعيد المالكي کے ہمراہ اسلام آباد انٹرنیشنل ایئرپورٹ پر’’روٹ مکہ‘‘ منصوبہ کا افتتاح کر دیا.

تفصیلا ت کے مطابق وفاقی سیکرٹری مذہبی امور ذوالفقار حیدر نے جمعہ کو اسلام آباد انٹرنیشنل ایئرپورٹ پر سعودی سفیر نواف سعید المالکی کے ہمراہ ’’روٹ مکہ‘‘ منصوبہ کا افتتاح کر دیا۔ اس موقع پر سیکرٹری مذہبی امور، سول ایوی ایشن اتھارٹی، اینٹی نارکوٹکس، ایئرپورٹ سیکورٹی فورس کے اعلیٰ حکام اور میڈیا کے نمائندے بھی موجود تھے۔ سیکرٹری مذہبی امور نے میڈیا کو بتایا کہ اسلام آباد سے روانہ ہونے والے عازمینِ حج کی سعودی امیگریشن اور کسٹم کے مراحل اسلام آباد میں ہی مکمل ہو جائیں گے اور یوں یہ عازمین حج سعودی ایئرپورٹ سے مختصر وقت میں باہر آ کر اپنی بسوں کے ذریعے رہائش گاہوں کی جانب روانہ ہو جائیں گے۔ اس سال اسلام آباد اور کراچی ائرپورٹ سے جانے والے حجاج اس سہولت سے فائدہ اٹھائیں گے، گذشتہ سال روٹ مکہ سے جانے والوں حجاج تعداد 26 ہزار تھی۔ اس سال کوشش کی ہے کہ دوگنی تعداد میں پاکستانی عازمین حج اس سہولت سے فائدہ اٹھائیں۔ سیکرٹری مذہبی امور ذوالفقار حیدر نے مزید کہا کہ سعودی حکومت کی جانب سے پاکستانی عوام کیلئے حج میں آسانی اور سہولیات کی فراہمی قابل ستائش ہے۔ حکومت پاکستان خود بھی اللہ کے مہمانوں کی آسائش اور آسانی کیلئے تمام وسائل بروئے کار لا رہی ہے۔ سعودی عرب کے سفیر نواف سعید المالکی نے کہا کہ ’’روٹ مکہ‘‘ ایک بڑا اقدام ہے، اس سے پاکستانی حجاج کرام کو ایک ہی چھت کے نیچے تمام سہولت ملے گی، سعودی حکومت اپنے مہمانوں کی مکمل خدمت کیلئے تیار ہے، وزیراعظم محمد شہباز شریف کے روڈ ٹو مکہ کے حوالے سے اقدامات پر شکر گزار ہوں، کوشش ہوگی پاکستانی عازمین کو دیگر ایئرپورٹ پر بھی اگلے سال سہولت دیں۔ تقریب کے آخر میں معزز سفیرِ سعودی عرب نواف سعید المالکی نے عازمین حج سے فردا فردا ملاقات کی اور تحائف پیش کیے۔