اسلام آباد (سٹاف رپورٹر)چیئرپرسن بینظیر انکم سپورٹ پروگرام روبینہ خالد نے صوابی میں بینظیر انکم سپورٹ پروگرام کے ادائیگی مراکز کا دورہ کیا ۔ چیئرپرسن روبینہ خالد نے مستحق خواتین میں ادائیگیوں کی تقسیم کے عمل ، ادائیگی مراکز میں موجودہ انتظامات اور سہولیات کا جائزہ بھی لیا۔ انہوںنے مستحق خواتین سے براہ راست بات چیت کی اور ان کے مسائل سنے۔انہوں نے کہا کہ بینظیر انکم سپورٹ پروگرام سیاسی وابستگی سے بالاتر تمام غریب ومستحق افراد کی مدد کررہا ہے۔ روبینہ خالد نے کہا کہ ہم نے مستحق خواتین کو باعزت اور شفاف طریقے سے رقوم کی فراہمی کو یقینی بنانا ہماری ذمہ داری ہے۔ چیئرپرسن بینظیر انکم سپورٹ پروگرام نے خواتین کو ہدایت کہا کہ کفالت کی سہ ماہی قسط کی رقم 10500روپے ہے اور آپ بینظیر انکم سپورٹ پروگرام کے سرکاری نمبر 8171 سے پیغام موصول ہونے پر ہی ادائیگی مرکز پرتشریف لائیں۔ انہوں نے کہا کہ کٹوتی کی صورت میں فوری طور پر بینظیر انکم سپورٹ پروگرام ہیلپ لائن نمبر 080026477 پر شکایت درج کرائیں ۔ روبینہ خالد نے بی آئی ایس پی کے عملے کو ہدایت کی کہ وہ بزرگ اور چھوٹے بچوں والی خواتین کو ترجیحی بنیادوں پر رقوم کی ادائیگی کی جائے۔ انہوں نے کہا کہ بینظیر انکم سپورٹ پروگرام کے تحت 95 لاکھ سے زائد خاندان پروگرام سے مستفید ہورہے ہیں اور مزید مستحق گھرانوں کیلئے سروے کا عمل جاری ہے۔ چیئرپرسن بینظیر انکم سپورٹ پروگرام نے مستحق گھرانوں کے افراد کیلئے تکنیکی مہارت اور چھوٹے قرضوں کی فراہمی پر زور بھی دیا۔