اسلام آباد: صدر، بین الاقوامی اسلامی یونیورسٹی، اسلام آباد، ڈاکٹر ھذال حمود العتیبی نے حال ہی میں منائے جانے والے یوم تکبیر کی اہمیت پر زور دیتے ہوئے کہا ہے کہ پاکستان کا ایٹمی طاقت ہونا نہ صرف پاکستان بلکہ پوری مسلم دنیا کے لیے اعزاز ہے۔ صدر جامعہ نے افواج پاکستان کی خدمات کو بھی خراج تحسین پیش کیا۔ ان خیالات کا اظہار انہوں نے بین الاقوامی اسلامی یونیورسٹی میں افواج پاکستان (آرمی، نیوی اور ایئر فورس) کے افسران کے لیے دعوۃ اکیڈمی کے زیر اہتمام 39ویں ہیومن ریسورس ڈویلپمنٹ کورس کی اختتامی تقریب سے خطاب کرتے ہوے کیا ۔انہوں نے کہا کہ کہ یونیورسٹی جلد اپنی اکیڈمیز اور اداروں کے ذریعے فاصلاتی تعلیم اور آن لائن تربیت کے پروگراموں کا آغاز کرے گی ۔ انہوں نے اسلامی یونیورسٹی کےتربیتی اقدامات اور تحقیق کا حوالہ دیتے ہوئے یونیورسٹیوں کے اہم سماجی کردار پر روشنی ڈالی۔ ڈاکٹر العتیبی نے مسلم دنیا کی خدمت کرنے کی یونیورسٹی کی صلاحیت پر زور دیتے ہوئے عالمی شہرت کی طرف یونیورسٹی کی رفتار کے لیے پر امیدی کا اظہار کیا۔انہوں نے مزید کہا کہ یونیورسٹی کو ترقی راہ پر گامزن کر دیا گیا ہے اور جلد ہی یونیورسٹی دنیا کے صف اول کے تعلیمی اداروں میں شامل ہو گی۔ انہوں نے یونیورسٹی کے وژن، اس کی تاریخ اور مستقبل کے مقاصد کو واضح بھی کیا۔ انہوں نے یونیورسٹی کی ترقی کے وژن کو بھی شیئر کیا اور یونیورسٹی کے اکیڈمک ایکسیلنس کے لیے اٹھائے گئے تازہ ترین اقدامات سے آگاہ کیا۔ انہوں نے نوجوانوں کے ذہنوں میں اسلامی افکار کے فروغ اور روزمرہ زندگی کے معمولات میں دین سے رہنمائی کی اہمیت پر بھی روشنی ڈالی۔ انہوں نے خصوصی طور پر اس بات کا تذکرہ کیا کہ یونیورسٹی معاشرے کی خدمت اور اسلام کے حقیقی تشخص کو عام کرنے پر پوری توجہ دے رہی ہے۔تقریب سے ڈائریکٹر جنرل دعوہ اکیڈمی ڈاکٹر محمد الیاس نے بھی خطاب کیا جنہوں نے کورس کی تفصیلات سے آگاہ کیا جس میں لیکچرز، سرگرمیوں کے موضوعات اور دیگر متعلقہ امور کا تذکرہ کیا گیا۔ انچارج ٹریننگ ڈیپارٹمنٹ ڈاکٹر عبدالفرید بروہی نے بھی کورس کی تفصیلات بتائیں۔