گوجرانوالہ(حافظ عبدالجبار)جمعیةعلما ء اسلام ضلع گوجرانوالہ کے زیرِ اہتمام رکن سازی مہم ضلعی ناظم انتخابات سید حفیظ الرحمن شاہ کی زیرصدارت افتتاحی تقریب منعقد ہوئی ،جمعیة علماء اسلام ضلع گوجرانوالہ میں رکن سازی مہم کا آغازکردیا گیا، جس میں مفکرِ اسلام شیخ الحدیث حضرت مولانا زاہدالراشدی صاحب بطور مہمانِ خصوصی شریک ہوئے، اس موقع پر انہوں نے خطاب کرتے ہوئے فرمایا کہ “میری سعادت ہے کہ میں سن 1962 ء سے جمعیة علماء اسلام کا رکن چلا آرہا ہوں اور آج ایک مرتبہ پھر رکنیت فارم پُر کر کے تجدیدِ عہد کر رہا ہوں اور اس کو میں اپنی سعادت سمجھتا ہوں۔ اور میں دنیا سے اس حالت میں جانا چاہتا ہوں کہ میری وابستگی جمعیةعلما ء اسلام کے ساتھ ہے۔انہوں نے کہا کہ اس وقت پاکستان میں اگر علما ء کی کوئی مئوثر نمائندہ جماعت ہے تو وہ صرف جمعیة علماء اسلام ہے جس کی قیادت حضرت مولانا فضل الرحمن صاحب فرما رہے ہیں، میں اس موقع پر پورے ملک میں جمعیة علماء اسلام کی رکن سازی مہم کے موقع پر کارکنان کو مبارک باد پیش کرتا ہوں بالخصوص گوجرانوالہ کے جماعتی دوستوں کو بھی آج کی اس کامیاب تقریب کے انعقاد پر مبارک باد پیش کرتا ہوں۔ اللہ تعالیٰ ہمیں جمعیة علماء اسلام کے ساتھ تاحیات وابستہ رکھے۔” اس موقع پر شہر بھر کے جید علماء کرام، جماعتی کارکنان اور ذمہ داران نے بھرپور شرکت کی اور جمعیة علماء اسلام کا رکنیت فارم پُر کرکے جماعت کے ساتھ تجدیدِ عہد کیا۔ اجلاس میں شہرو ضلع گوجرانوالہ، تحصیل صدر، تحصیل نوشہرہ ورکاں اور تحصیل کامونکی سے تعلق رکھنے والے ضلعی معاونین نے خصوصی شرکت کی اور رکن سازی کی کاپیاں حاصل کیں۔ضلعی ناظم انتخابات سید حفیظ الرحمن شاہ نے اس موقع پر کہا کہ ضلع بھر میں جمعیة علماء اسلام کا پیغام قریہ قریہ، بستی بستی اور گھر گھر تک پہنچائیں گے۔ ضلعی معاونین آج سے ہی رکن سازی مہم تیز کردیں اور ہر مسلمان تک جمعیة علماء اسلام کا پیغام پہنچائیں اور انہیں جمعیةکارکن بنائیں۔