اسلام آباد(ایم آئی ایم ایم ) پاکستان میں ترکی کے سفیر پروفیسر ڈاکٹر مہمت پیکی، چئیرمین پی اے آرسی ڈاکٹر غلام محمد علی ، ترک تعاون اور رابطہ ایجنسی (TIKA ) کے نائب صدر ڈاکٹر امت ناسی یورولما، اور TIKA کے کنٹری ہیڈ محسن بالسی، نے قومی زرعی تحقیقاتی مرکز اسلام آباد کے ہنی بی ریسرچ انسٹی ٹیوٹ (HBRI)میں شہد کی مکھیوں کے چھتے کی مصنوعات کی لیبارٹری اور ہارٹی کلچر ریسرچ انسٹی ٹیوٹ (HRI) میں فروٹ پلانٹس کے جرمپلازم ہینڈلنگ کے لیے گرین ہاوس کا افتتاح کیا۔ یہ تجربہ گاہیں TIKA کے تعاون سے قائم کی گئی ہیں۔
اس موقع پر ڈاکٹر مہمت پیکی نے کہا کہ یہ لیبز تربیت اور صلاحیت سازی کے لیے ایک مرکز کے طور پر کام کریں گی اور شہد کی مکھیوں سے منسلک کاروباری افراد، محققین، اور طلباءکو تحقیق میں معاونت فراہم کریں گی۔ چیئرمین پی اے آر سی کا کہنا تھا کہ ہم زرعی تحقیقی صلاحیتوں کو مضبوط بنانے کے لیے تعاون پرترکی کی حکومت اور ٹیکا کا تہہ دل سے شکریہ ادا کرتے ہیں۔ انہوں نے مزید کہا کہ یہ جدید ترین لیبارٹریزپاکستان میں مگس بانی اور زرعی تحقیق کو آگے بڑھانے کے لیے جاری کوششوں میں ایک اہم سنگ میل کی حیثیت رکھتی ہیں۔ ٹیکا نے HBRI میں شہد کی مکھیوں کی مصنوعی انسیمینیشن کی لیبارٹری قائم کر رکھی ہے جو معیاری ملکہ مکھی کی پیداوار کے لیے بہت اہمیت کی حامل ہے۔ اس موقع پرڈاکٹر امت ناسی نے کہا کہ تعاون اور اجتماعی کوششوں کے ذریعے ہم ایک متحرک اور پائیدار مگس بانی کی صنعت کی تعمیر کر سکتے ہیں جس سے تمام اسٹیک ہولڈرز کو فائدہ پہنچے گا۔
لیبز کا افتتاح پاکستان کے مگس بانی اور باغبانی کے شعبوں کے لیے ایک اہم پیشرفت ہے۔ شہد کی مکھیوں کی مصنوعات کی لیبارٹری شہد کی مصنوعات کے معیار اور پیداواری صلاحیت کو بڑھانے کے لیے ادارے کے عزم کو ظاہر کرتی ہے۔ اس سہولت سے ان مصنوعات کو بین الاقوامی معیار پر پورا اترنے میں مدد ملے گی، جس سے برآمدات میں اضافہ اور اقتصادی ترقی کی راہ ہموار ہوگی۔ دریں اثنا، ہارٹیکلچر ریسرچ انسٹی ٹیوٹ (HRI) کا نیا گرین ہاوس درجہ حرارت اور نمی کے کنٹرول کے نظام سے لیس ہے جس سے غیر ملکی اور مقامی پھلوں کے جراثیم کی بقا کی شرح کو بہتر بنانے میں مدد ملے گی نیز نئی اور امید افزا مصنوعات کو تیار کرنے کے لیے انتخاب کے عمل کو تیز کیا جا سکے گا۔ HRI کے سائنسدانوں نے پہلے ہی گرین ہاوس میں مختلف پھلوں پر تجربات شروع کر دیے ہیں، جس کے کامیاب نتائج برآمد ہو رہے ہیں.