اسلام آباد(آئی ایم ایم) وفاقی وزیر برائے ریاستی و سرحدی علاقہ جات و امور کشمیر و گلگت بلتستان انجینئر امیر مقام نے پیر کو یو این ایچ سی آر کے اعلیٰ سطحی وفد سے ملاقات کی جس کی قیادت اقوام متحدہ کے ہائی کمشنر برائے مہاجرین فلیپو گرانڈی کر رہے تھے۔ اجلاس میں سیکرٹری سیفران ظفر حسن، جوائنٹ سیکرٹری مہاجرین آغا وسیم احمد اور چیف کمشنر افغان مہاجرین محمد عباس خان اور وزارت سیفران اور وزارت خارجہ کے دیگر اعلیٰ حکام نے شرکت کی۔
اس موقع پر بات کرتے ہوئے وفاقی وزیر انجینئر امیر مقام نے کہا کہ پاکستان گزشتہ 45 سالوں سے افغان مہاجرین کے لیے یو این ایچ سی آر کی مسلسل تعاون کا اعتراف کرتا ہے۔ انہوں نے کہا کہ پاکستان لاکھوں افغان مہاجرین کی میزبانی کرتا رہا ہے اور انھیں تعلیم اور صحت کی سہولیات کے ساتھ تحفظ بھی فراہم کرتا ہے۔ انہوں نے مزید کہا کہ “اس وقت، 1.45 ملین رجسٹرڈ افغان شہری کارڈ ہولڈرز ہیں اور اس میں غیر رجسٹرڈ افغان مہاجرین اور دیگر شہریوں کی بڑی تعداد شامل نہیں ہے۔ وفاقی وزیر انجینئر امیر مقام نے تشویش کا اظہار کیا کہ افغان مہاجرین کی امداد اور پاکستان میں ان کی میزبانی کے لیے ترقیاتی فنڈز میں کمی ہے۔
یو این ایچ سی آر کے ہائی کمشنر برائے مہاجرین فلیپو گرانڈی نے چار دہائیوں سے زائد عرصے سے افغان مہاجرین کی میزبانی کرنے پر پاکستان کے عوام اور حکومت کی تعریف کی۔ انہوں نے کہا کہ UNHCR مہاجرین سے متعلق مسائل پر بات چیت کے لیے اکتوبر میں ایک عالمی مکالمے کا اہتمام کرے گا۔ انہوں نے کہا کہ اس موقع پر پاکستان کو خصوصی طور پر مدعو کیا جائے گا۔ انہوں نے امید ظاہر کی کہ یہ تقریب دنیا بھر میں پناہ گزینوں اور باقی ماندہ افراد کی مدد کے لیے ایک نئی جہت اور راہیں پیدا کرے گی۔ اعلیٰ سطحی وفد میں UNHCR کے علاقائی دفتر، بنکاک کی ریجنل ڈائریکٹر محترمہ Hai Kyung Jun، UNHCR کے جنیوا ہیڈ کوارٹر کے خصوصی مشیر برائے ترقی ، ہیرو ڈی ویلروشے اور یو این ایچ سی آر کے عالمی کمیونیکیشن سروس کے سربراہ ایون واٹسن شامل تھے۔
