اسلام آباد(آئی ایم ایم)پاکستان میں بین الاقوامی خبر رساں اداروں سے وابستہ صحافیوں کا اجلاس نیشنل پریس کلب اسلام آباد میں منعقد ہوا۔ اس اجتماع میں بین الاقوامی میڈیا آؤٹ لیٹس کے لیے کام کرنے والے پاکستانی صحافیوں کو درپیش پیشہ ورانہ چیلنجز پر توجہ دی گئی۔
اجلاس میں متفقہ طور پر اس بات پر اتفاق کیا گیا کہ ان صحافیوں کے مسائل اور خدشات کو دور کرنے کے لیے ایک باضابطہ پلیٹ فارم اور ایک منتخب ادارے کی اشد ضرورت ہے۔ نتیجتاً پانچ رکنی کمیٹی تشکیل دی گئی جس میں سینئر صحافی سجاد ترکزئی کو کنوینر مقرر کیا گیا۔ کمیٹی میں اے ایف پی سے محمد داؤد اور شاروق طارق، الجزیرہ ٹی وی سے حمید اللہ خان اور روسی نیوز ایجنسی کے حمید اللہ عابد شامل ہیں۔

کمیٹی کا بنیادی مقصد بین الاقوامی میڈیا سے وابستہ صحافیوں کو متحد کرنا اور باضابطہ منتخب کابینہ کے لیے کام کرنا ہے۔ مزید برآں، کمیٹی آئندہ اجلاس کے لیے تحریری سفارشات کا مسودہ تیار کرے گی۔اجلاس میں الجزیرہ ٹی وی کے تنویر خان، اے ایف پی سے مسرور گیلانی، زین زمان جنجوعہ، عامر قریشی، اے ایف پی سے فاروق نعیم، این ایچ کے جاپان سے نذر الاسلام، اردو نیوز کے محمد سہیل، چائنہ ٹی وی سے بابر ملک، یوسف اعوان، اردو نیوز سے رشید بھٹی سمیت نامور صحافیوں نے شرکت کی۔