اسلام آباد(آئی ایم ایم) پاکستان میں سری لنکا کے ہائی کمشنر ایڈمرل (ریٹائرڈ) روی وجے گونارتنے نے پاکستان ملٹری آئی اسپتال راولپنڈی کے ڈائریکٹر بریگیڈیئر (ڈاکٹر) وقار کو مزید دس قرنیے عطیہ کیے ہیں۔ یہ قرنیے سری لنکا کے مرحوم افراد کی جانب سے عطیہ کیے گئے ہیں تاکہ ضرورت مند افراد کی بینائی بحال کی جا سکے۔ یہ عطیہ سری لنکن عوام کی جانب سے پاکستان کے عوام کو دیے گئے 26,215ویں قرنیے کی نمائندگی کرتا ہے۔یہ قرنیے ان بہادر پاکستانی فوجیوں کو لگائے جائیں گے جنہوں نے دہشت گردی کی سرگرمیوں، خصوصاً دیسی ساختہ دھماکہ خیز آلات (آئی ای ڈیز) کے دھماکوں کے نتیجے میں اپنی بینائی کھو دی ہے۔ اس کے علاوہ، یہ قرنیے ریٹائرڈ پاکستانی فوجی اہلکاروں اور ان کے اہل خانہ کو بھی فراہم کیے جائیں گے۔ہائی کمشنر ایڈمرل وجے گونارتنے نے پاکستان کے عوام، خصوصاً پاکستان ملٹری کی مدد کرنے پر اپنی خوشی اور فخر کا اظہار کیا۔

انہوں نے کہا، “پاکستان نے سری لنکا میں ایل ٹی ٹی ای دہشت گردوں کے خلاف لڑائی میں ہمیں فوجی ہارڈ ویئر اور تربیت میں غیر مشروط مدد فراہم کی۔ پاکستان کی حمایت نے ہمارے حالیہ تاریخ کے نازک وقتوں میں ہمیں دہشت گردی کے خطرے کو ختم کرنے میں مدد دی۔”۔ہائی کمشنر کے ہمراہ سری لنکا ہائی کمیشن اسلام آباد کے ڈیفنس ایڈوائزر بریگیڈیئر کامندا سلوا بھی موجود تھے۔ بعد ازاں انہوں نے راولپنڈی کے ملٹری آئی اسپتال میں جدید ترین آپریشن تھیٹرز میں پاکستانی ملٹری آئی اسپیشلسٹس کی جانب سے قرنیے کی پیوند کاری کا مشاہدہ کیا۔ان دس قرنیوں کی فضائی منتقلی کی ہم آہنگی اور فنڈنگ سری لنکا- پاکستان فرینڈشپ سوسائٹی کے صدر مسٹر ادریس آدمانی نے سری لنکا کی آئی ڈونیشن سوسائٹی کے تعاون سے کی۔