گوجرانوالہ (آئی ایم ایم)جماعت اہلسنت کے نامور خطیب پیرسید فدا حسین شاہ حافظ آبادی نے کہا ہے کہ ا ہل بیت اطہار سے محبت ایمان ھے شہدا کربلا نے دین اسلام کیلئے تاریخ ساز قربانیاں دیں،ہمیں واقعہ کربلا کے آفاقی اصولوں کو اپنانا ہوگا۔ان خیالات کا اظہار انہوں نے مرکزی جا مع مسجد گلزار مدینہ راہوالی میں منعقدہ پیغام سید نا امام حسین کانفرنس سے خطاب کرتے ہوئے کیا۔ اس موقع پر الحاج مولانا محمد اکبر نقشبندی،پروفیسر حافظ محمد شبیر حسین چشتی،علامہ قاری محمد امین چشتی،حافظ محمد عطالمصطفیٰ جمیل چشتی،قاری محمد ضیاء المرتضیٰ چشتی،ممتاز سیاسی سماجی شخصیت خالد پرویز بلو بٹ ،خرم حمید بٹ، حافظ اشرف رضا قاری امجد طاھری علامہ ظفر عظیمی ،صاحبزادہ محمد نعمان صدیقی،حافظ عدیل عارف،ڈاکٹر عبدالرشید انصاری ،علامہ قاری فیاض احمد فیاضی ، خالد شریف ، محمد اصغر بٹ محمد اکبر بیگ حاجی ارشد کھوکھر نے بھی خطاب کیا۔
انہوں نے کہا کہ میدان کربلا میں شجاعت و بہادری اور صبر و استقامت کی عظیم تاریخ رقم کرکے نواسہ رسول حضرت سیدنا امام حسین نے ثابت کردیا کہ حق و صداقت،اعلی انسانی اقدار کے تحفظ اور دین کی سربلندی کیلئے بڑی قربانی پیش کی جاسکتی ہے مگر باطل کے آگے سرنگوں ہونا مردان حق کا شیوہ نہیں۔تاجدار کربلا نے کثرت کو نہیں حق و سچ کو معیار بنا کر قیامت تک کیلئے حق و باطل کا فرق واضح کردیا ۔ انہوں نے کہا کہ اہل بیت اطہار سے محبت ایمان کامل کی علامت ھے سیدنا امام حسین رضی اللہ عنہ کے نقش قدم پر چلتے ہوئے انسان اپنی زندگی بہتر بناسکتا ھے حالات کو بہتر بنانے کیلئے حسینی کردار کو ادا کرنے کی اشد ضرورت ہے۔اس موقع پر علامہ مولانا محمد حنیف چشتی کے ادارہ جامعہ چشتیہ رضویہ ضیاء القرآن راہوالی کے طلباء کو امتحان میں نمایاں پوزیشنیں لینے پر انعامات سے بھی نوازا گیا۔