کراچی(بیورو رپورٹ)کراچی میں پسند کی شادی کرنے والا جوڑا منگھوپیر میں قتل.خیبرپختونخوا کے علاقے تورغر سے تعلق رکھنے والے پسند کی شادی کرنے والے جوڑے کو کراچی کے علاقے منگھوپیر میں انتہائی بےدردی سے قتل کردیا گیا۔منگھوپیر پولیس کے ایس ایچ او بشیر احمد وڈھو نے بتایا کہ 22 سالہ عادل محمد اور 20 سالہ سائرہ لقمان کو جی-19 بس اسٹاپ کے قریب امیر محمد گوٹھ کی کچی آبادی میں ایک گھر کے اندر گولی مار کر قتل کیا گیا۔
ان کا کہنا تھا کہ دونوں افراد کے جسموں پر چھریوں کے زخم کے بھی نشان تھے۔انہوں نے بتایا کہ مقتولین نارتھ ناظم آباد کے حسین ڈی سلوا ٹاؤن کے رہائشی تھے اور انہوں نے حال ہی میں اپنی مرضی سے گھر والوں کی مرضی کیخلاف شادی کی تھی۔پولیس افسر نے بتایا کہ نوبیاہتا جوڑا منگھوپیر میں چھپ کر رہ رہا تھا، کیونکہ لڑکی کے والدین ان کی شادی کے خلاف تھے۔ لڑکی کے والدین دونوں میاں بیوی کی تلاش میں پھرتے رہے۔
انہوں نے کہا کہ لڑکی کے رشتہ داروں نے دونوں کا سراغ لگایا، ابتدائی طور پر دو خواتین ان کے کرائے کے گھر میں داخل ہوئیں جنہوں نے وہاں جوڑے کی موجودگی کی ’تصدیق‘ کی۔بعد ازاں، تین موٹر سائیکلوں پر سوار چھ ملزمان گھر میں داخل ہوئے اور انہیں گولیاں مار کر قتل کرنے کے بعد فرار ہو گئے۔ابتدائی تحقیقات کے مطابق مقتولین کا تعلق خیبر پختونخوا کے علاقے تورغر سے تھا اور ان کی لاشوں کو قانونی کارروائی کے لیے عباسی شہید ہسپتال منتقل کردیا گیا۔
