اسلام آباد(آئی ایم ایم) سینیٹر روبینہ خالد چیئرپرسن بینظیر انکم سپورٹ پروگرام (BISP) نے آج نادرا ہیڈ کوارٹرز میں نیشنل ڈیٹا بیس اینڈ رجسٹریشن اتھارٹی (نادرا) کے چیئرمین لیفٹیننٹ جنرل محمد منیر افسر سے ملاقات کی۔ ملاقات میں دونوں اداروں کے مابین تعاون کو بڑھانے کے لیے باہمی امور پر توجہ مرکوز کی گئی۔
نادرا کے چیئرمین نے بی آئی ایس پی کی جانب سے کیے گئے مؤثر اقدامات کی تعریف کی، خاص طور پر اس بات پر روشنی ڈالی کہ کس طرح بی آئی ایس پی نے خواتین اوربچوں کی رجسٹریشن میں نادرا کی ملک گیر کوششوں کو نمایاں طور پر مکمل کیا ہے۔
اس بات پر اتفاق کیا گیا کہ نادرا کی جانب سے BISP کے دور دراز علاقوں خصوصاً بلوچستان اور سندھ میں موبائل رجسٹریشن وین (MRVs) کی تعیناتی کے اقدام کے لیے مکمل تعاون کیا جائیگا تاکہ ان علاقوں میں BISP خدمات کی رسائی کو بڑھایا جاسکے۔
مزید برآں، بی آئی ایس پی اور نادرا کے عملے کو ان یونین کونسلوں میں اکٹھا کیا جائے گا جہاں نادرا اپنے پائلٹ پراجیکٹ پر عمل پیرا ہے، جس کا مقصد بی آئی ایس پی کی رسائی کو بڑھانا اور مستحق افراد کی رجسٹریشن میں اضافہ کو یقینی بنانا ہے۔
مزید برآں، نادرا بی آئی ایس پی کے صوبائی دفاتر میں نادرا کی خدمات سے متعلق بی آئی ایس پی مستحقین کو درپیش مسائل کو حل کرنے کے لیے مطلوبہ مدد فراہم کرے گا۔ اس بہتر تعاون سے آپریشنز کو مزید ہموار کیا جائے گا، جس سے دونوں تنظیموں کے مشترکہ مشن کو تقویت ملے گی تاکہ شہریوں کی زیادہ مؤثر طریقے سے خدمت کی جا سکے۔
سینیٹر روبینہ خالد نے نادرا کے تعاون پر اظہار تشکر کیا اور شہریوں کو خدمات کی فراہمی کو بہتر بنانے میں اس تعاون کی اہمیت پر زور دیا۔ نادرا کے چیئرمین نے مشترکہ اہداف کے حصول کے لیے بی آئی ایس پی کے ساتھ مل کر کام کرنے کے عزم کا اعادہ کیا۔
