راولپنڈی (آئی ایم ایم)کمشنر راولپنڈی ڈویژن انجینئر عامر خٹک نے آر پی او بابر سرفراز الپا کے ہمراہ چہلم کے موقع پر جلوس کے لئے کئے جانے والے سیکورٹی انتظامات کا جائزہ لینے کے لیے کمیٹی چوک دورہ کیا۔ بعد ازاں انہوں نے میونسپل کارپوریشن میں قائم کنٹرول روم کا بھی جائزہ لیا اور تمام محکموں کی حاضری کا معائینہ کیا۔اس موقع پر ڈپٹی کمشنر راولپنڈی حسن وقار چیمہ، سی پی او خالد ہمدانی، ایڈیشنل ڈپٹی کمشنر حسان طارق و دیگر انتظامی افسران بھی ان کے ہمراہ تھے۔
کمشنر راولپنڈی نے چہلم کے جلوس روٹ کا معائنہ کیا۔ انہوں نے سکیورٹی و دیگر انتظامات کا تفصیلی جائزہ لیا اور ضروری ہدایات جاری کیں – انہوں نے کہا کہ چہلم کے جلوس اور مجالس کو فول پروف سکیورٹی مہیا کی جارہی ہے۔ انہوں نے کہا کہ جس طرح محرم الحرام میں امن اور بھائی چارے کو قائم رکھا ہے اسی طرح چہلم پر بھی کسی کو انتشار پھیلانے کی اجازت نہیں دی جائے گی- انہوں نے کہاکہ جلوسوں اور حساس مقامات پر کڑی نگرانی رکھی جارہی ہے تا کہ عزداروں کو پر امن ماحول فراہم کیا جا سکے۔ اسکے علاوہ جلوس روٹس کی نگرانی کے لئے کنٹرول روم مکمل طور پر فعال ہے۔
کمشنر راولپنڈی ڈویژن نے مزید کہا کہ ضلعی انتظامیہ کی جانب سے پولیس ودیگر محکموں کے ساتھ مل کرتمام تر انتظامات مکمل کیے جا چکے ہیں۔ انہوں نے کہا کہ ہمارا مذ ہب اسلام دوسرے مسالک کا احترام کرنے کا دیتا ہے۔ جلوس کی سکیورٹی کے لئے پولیس کے علاؤہ رضاکاروں کی بڑی تعداد بھی متعین کی گئی ہے۔ مکمل تلاشی کے بغیر کسی کو جلوس میں داخل نہیں ہونے دیا جا رہا۔ آر پی او بابر سرفراز الپا نے کہا کہ دشمن کے ناپاک عزائم کو ناکام کرنے کے لئے ضلعی انتظامیہ کے ساتھ ساتھ امن کمیٹی ممبران بشمول تمام مسالک کے علماء کرام اپنا فعال کردار ادا کررہے ہیں۔جلوس کے لئے وقت کی پاسداری کروائی جا رہی ہے اور امید کی جاتی ہے کہ تمام اداروں کے تعاون سے راولپنڈی ڈویژن کا امن امان مستقبل میں بھی ایسے ہی قائم ودائم رہے گا-
