پشاور(آئی ایم ایم)گورنر خیبرپختونخوا فیصل کریم کنڈی نے صوبہ کی سیاسی جماعتوں کے قائدین کو تحریری خط ارسال کردیا ۔ صوبہ کے مسائل کے حل کے لیئے ٹاسک فورس کے قیام کے لیئے گورنر خیبرپختونخوا کی جانب سے پاکستان تحریک انصاف سمیت صوبہ کی تمام سیاسی جماعتوں کے صوبائی صدور کو تحریری خط لکھا گیا جس میں موقف اختیار کیا گیا ہے سیاسی ہم آہنگی کا فروغ اور صوبہ کے وسائل کی منصفانہ تقسیم کے لیئے وفاق سے بات کرنا اور مثبت انداز سے صوبہ کا حق لینا انتہائی ضروری ہے اس مقصد کے لیئے یونائیٹڈ ٹاسک کے قیام کی تجویز پیش کرتا ہوں اس فورس کو گورنر ہاؤس کی جانب سے ہرممکن تعاون فراہم کیا جائے گا ۔
خط میں کہا گیا کہ قیام امن ، تیل پر ایکسائز ڈیوٹی، این ایف سی ایوارڈ کے تحت پانی کا حصہ، نیٹ ہائیڈل پرافٹ اور دیگر حقوق کا حصول اس ٹاسک فورس کی ترجیحات ہونگی ۔ گورنر کی جانب سے جن سیاسی جماعتوں اور قائدین کو خط لکھا گیا ہے اس میں میاں افتخار حسین عوامی نیشنل پارٹی ، سکندر حیات شیرپاؤ قومی وطن پارٹی ، سینٹر مولانا عطا الرحمن صوبائی امیر جمعیت علماء اسلام ، مولانا جہانذیب علی جعفری صوبائی صدر مجلس وحدت المسلمین، علامہ ڈاکٹر محمد شفیق امینی صوبائی صدر تحریک لبیک پاکستان ، انجنیئر امیر مقام صوبائی صدر پاکستان مسلم لیگ ن ، محمود خان صوبائی صدر پاکستان تحریک انصاف پارلیمنٹیرین ، سلار فیاض علی صوبائی صدر مزدور کسان پارٹی ، مولانا حامد الحق حقانی صوبائی صدر جمیعت علمائے اسلام سمیع الحق گروپ ،پروفیسر محمد ابراہیم صوبائی صدر جماعت اسلامی ، سید محمد علی شاہ باچا صوبائی صدر پاکستان پیپلز پارٹی، فیاض صوبائی صدر جمعیت علمائے پاکستان نورانی ، علی امین گنڈاپور صوبائی صدر پاکستان تحریک انصاف تحریک انصاف خیبرپختونخواہ شامل ہیں ۔
گورنر خیبرپختونخوا فیصل کریم کنڈی کی جانب سے ٹاسک فورس کے پہلے اجلاس کے انعقاد کے لیئے تمام قائدین یا انکے نمائندوں کو گورنر ہاؤس پشاور میں بلانے کا عندیہ دیا گیا ہے تاکہ ایک مشترکہ چارٹر آف ڈیمانڈ تیار کرکے وفاق کو بھجوایا جائے.
