لاہور(آئی ایم ایم) پاکستان پیپلز پارٹی وسطی پنجاب کے جنرل سیکرٹری سید حسن مرتضی نے کہا ہے کہ وہ وقت بھی جلدآئیگا کہ پنجاب کا وزیر اعلی اور پاکستان کا وزیراعظم جیالا ہوگا،ہم ادارے کھڑے کرنے والے لوگ ہے مگر آج جو ہماری فلیکسز اتار کر ہمارے ساتھ ہوا وہ ناقابل قبول ہے،ہم آئین اور قانون کی بالادستی چاہتے ہیں اورجمہوریت کیلئے جدوجہد جاری رکھیں گے۔وہ چیئرنگ کراس مال روڈ پر پیپلز پارٹی کی طرف سے 26ویں آئینی ترمیم کی دو تہائی اکثریت سے پاس ہونے کی خوشی میں منائے جانیوالے جشن پارلیمانی بالا دستی سے خطاب کر رہے تھے۔اس موقع پر ثمینہ خالد گھرکی،فیصل میر،چودھری اسلم گل،حاجی عزیز الرحمن چن،امجد جٹ،اصف ناگرہ، چودھری عاطف رفیق،زاہد ذوالفقار،ایڈون سہوترا،سمیت پارٹی کے سینکڑوں کارکن اور جیالے موجود تھے جو زندگی ہے بی بی ژندہ ہے ،زندہ ہے بھٹو ژندہ ہے،میری جان بلاول زندہ باد،آصف زرداری ژندہ باد کے نعرے لگا رھے تھے۔
جنرل سیکرٹری پیپلزپارٹی سنٹرل پنجاب سید حسن مرتضیٰ نے کہا کہ شکریہ لاہور آج میں لاہور کے جیالوں کا شکر گزار ہوں،اج سب اپنی نفرتیں ختم کرکے ایک سٹیج پر اکٹھے ہوئے ہیں،آج کا جشن پارلیمان کی کامیابی ہے،بلاول بھٹو نے ثابت کیا کہ وہ قدآورسیاسی شخصیت ہیں،آئینی ترمیم کی کامیابی میں دما دم مست قلند ہورہا ہے۔انہوں نے کہا کہ لندن میں سابق چیف جسٹس غازی فائض عیسی پر حملہ عدلیہ پر حملہ ہے جس کی ہم پر زور مذمت کرتے ہیں۔ پیپلزپارٹی سنٹرل پنجاب کے انفارمیشن سیکرٹری شہزاد سعید چیمہ نے کہا کہ آج جشن کا دن ہے ،، یہ چھبیسویں آئینی ترمیم کی کامیابی کی خوشی ہے، آج میثاق جمہوریت کی تکمیل ہوئی ہے جو بہت جواں مردی سے کی گئی، 26 ویں آئینی ترمیم منظور کرا کے بلاول بھٹو زرداری نے اپنی صلاحیتوں سےثابت کیا ہے کہ وہ وزیراعظم بننے کی صلاحیت رکھتے ہیں۔
انہوں نے کہا کہ وزیر اعظم بلاول کے نعرے اتنی زور سے لگائیں کہ آواز 8 کلب تک جائے۔جشن پارلیمانی بالا دستی سے خطاب کرتے ہوئے چودھری اسلم گل اور عثمان ملک نے کیا کہ 26ویں آئینی ترمیم کے نتیجے میں ہونے والی عدالتی اصلاحات کے نتیجے میں ملک میں جمہوریت اور پارلیمان پھلے پھولے گی اور عوام کو درپیش مسائل میں ریلیف ملیگا۔فیصل میر نے کہا کہ بہن مریم نواز سے گزارش کروں گا جمہوری قدروں کا کچھ تو خیال کریں،جنرل ضیاء الحق کو پیپلز پارٹی کا پرچم نظر آتا تو اتروا دیتا تھا ، مریم نواز آ پ کا تو یہ مسئلہ نہیں ہونا چاہیے۔
انہوں نے کہا کہ مریم نواز نے صدر آصف علی زرداری کی سالگرہ اور پی ایس ایف کا کنونشن روکنے کی بھی کوشش کی،جہاں آرا وٹو نے خطاب کرتے ہوئے کہا کہ عدالتوں نے ذوالفقار علی بھٹو کو غیر قانونی پھانسی دی۔تقریب سے پی ایس ایف پنجاب کے سیکرٹری اطلاعات سبط حسن نے بھی خطاب کیا۔جشن کے آخر میں پیپلز پارٹی کے کارکنوں کی طرف سے چیئرنگ کراس چوک میں آتش بازی کا مظاہرہ کیا گیا اورجیالوں نے ڈھول کی تھاپ پر بھنگڑے ڈالے۔
