اسلام آباد (آئی ایم ایم)صدر مملکت آصف علی زرداری نے پاکستان اور سعودی عرب کے درمیان برادرانہ تعلقات کو مزید وسعت دینے کے لئے سعودی عرب کے ساتھ پارلیمانی تعاون اور اعلیٰ سطح کے تبادلوں کو بڑھانے کی ضرورت پر زور دیتے ہوئے کہا ہے کہ دونوں ممالک کے مابین اقتصادی اور سرمایہ کاری تعاون بڑھانے کی مزید گنجائش موجود ہے۔ صدر مملکت نے ان خیالات کا اظہار سعودی عرب کی شوریٰ کونسل کے چیئرمین ڈاکٹر عبداللہ بن محمد بن ابراہیم الشیخ سے گفتگو کرتے ہوئے کیا جنہوں نے شوریٰ کونسل کے ارکان کے ہمراہ جمعرات کو ایوان صدر میں ان سے ملاقات کی۔ ایوان صدر کے پریس ونگ کے مطابق اجلاس میں سپیکر قومی اسمبلی سردار ایاز صادق، ڈپٹی سپیکر قومی اسمبلی سید غلام مصطفیٰ شاہ، پاکستان میں سعودی عرب کے سفیر نواف بن سعید المالکی، ارکان پارلیمنٹ اور اعلیٰ سرکاری حکام نے شرکت کی۔ صدر مملکت نے سعودی عرب کے ساتھ اقتصادی، سیاسی اور ثقافتی تعلقات مزید مضبوط بنانے کے عزم کا اعادہ کیا اور کہا کہ پاکستان اور سعودی عرب کے مابین تاریخی اور برادرانہ تعلقات ہیں۔
انہوں نے کہا کہ سعودی عرب کے ساتھ پارلیمانی تعاون سے پاک۔سعودی عرب برادرانہ تعلقات مزید گہرے ہوں گے، پاکستان اور سعودی عرب کے تعلقات مشترکہ عقیدے، تاریخ اور ثقافت پر استوار ہیں۔ صدر مملکت نے بے گناہ شہریوں کو نشانہ بنانے اور اسرائیلی جارحیت سے پیدا ہونے والی مشرق وسطیٰ کی سنگین صورتحال پر تشویش کا اظہار کرتے ہوئے کہا کہ پاکستان فلسطین، لبنان اور شام سے تعلق رکھنے والے اپنے بھائیوں اور بہنوں کے ساتھ کھڑا ہے۔ صدر مملکت نے خادمین حرمین شریفین اور شہزادہ محمد بن سلمان کیلئے نیک خواہشات کا پیغام دیا اور کہا کہ پاکستانی عوام شاہ سلمان بن عبدالعزیز کی صحت، تندرستی اور درازی عمر کے لئے دعاگو ہیں۔
ملاقات کے دوران دونوں فریقوں نے دیرینہ دوطرفہ تعلقات کو مزید مضبوط اور اسٹریٹجک شراکت داری میں بدلنے کی ضرورت پر زور دیا۔ سعودی عرب کی شوریٰ کونسل کے چیئرمین ڈاکٹر عبداللہ بن محمد بن ابراہیم الشیخ نے اپنے دورہ پاکستان کو انتہائی نتیجہ خیز قرار دیتے ہوئے کہا کہ ان کی پاکستان کی قیادت اور اراکین پارلیمنٹ کے ساتھ نتیجہ خیز بات چیت ہوئی ہے۔چیئرمین شوریٰ کونسل نے شاہ سلمان اور شہزادہ محمد بن سلمان کی جانب سے صدر مملکت کی صحت کے لئے نیک تمنائوں کا اظہار کیا۔
