اسلام آباد (آئی ایم ایم) پاکستان کی قومی ایئر لائن پی آئی اے کے ملک گیر ریفرنڈم میں پیپلز پارٹی کی حمایت یافتہ پیپلز یونیٹی آف پی آئی اے ایمپلائیز نے ایئر لیگ اور انصاف فرنٹ کو ایک بار پھر تاریخی شکست دے کر مسلسل پانچویں بار سی بی اے کا تاج اپنے سر سجا لیا ھے۔ ریفرنڈم کیلئے گذشتہ روز اسلام آباد، لاہور، پشاور، کراچی اور کوئٹہ سمیت ملک بھر کے تمام ایئرپورٹس اور پی آئی اے دفاتر میں قومی ایئرلائن کے ملازمین نے اپنا حق رائے دہی استعمال کیا، رات گئے موصول ہونے والے غیرحتمی اور غیرسرکاری نتائج کے مطابق پیپلز یونیٹی نے تمام پولنگ اسٹیشنز پر کلین سویپ کرتے ہوئے 1229 ووٹ حاصل کیے ہیں جبکہ ایئر لیگ اور انصاف فرنٹ بالترتیب 750 اور 70 حاصل کر سکی ہیں۔ ایئر لیگ کو حکومتی جماعت مسلم لیگ ن اور ایم کیو ایم اور انصاف فرنٹ کو پاکستان تحریک انصاف کی حمایت حاصل تھی۔ اسطرح پیپلز یونیٹی نے ایم کیو ایم اور ن لیگ کے اتحاد کو بھی شکست دی ہے۔
پیپلز لیبر بیورو پاکستان کے انچارج اور پی پی پی سنٹرل ایگزیکٹو کمیٹی کے رکن چوہدری منظور احمد نے پی آئی اے ریفرنڈم میں پیپلز یونیٹی کی شاندار جیت پر مسرت کا اظہار کرتے ہوئے نومنتخب سی بی اے کے مرکزی صدر ہدایت اللہ خان، اسلام آباد بیس کے صدر رمضان لغاری، جنرل سیکرٹری سہیل مختار، لاہور کے صدر ساجد محمود گجر، جنرل سیکرٹری کاشف رانا اور پشاور کے صدر سیماب افغانی سمیت ملک بھر کے کامیاب عہدیداران کو مبارک باد پیش کی ہے۔ انہوں نے کہا کہ پیپلز یونیٹی کی یہ تاریخی کامیابی پیپلز پارٹی اور اس کے چیئرمین بلاول بھٹو زرداری کی مزدور دوست پالیسیوں کا نتیجہ ہے۔
دریں اثناء آج پولنگ ڈے کے موقع پر پیپلز لیبر بیورو سنٹرل پنجاب کے صدر سید نذر حسین شاہ، نائب صدر محمد اعجاز، صوبائی سیکرٹری اطلاعات سجاد حسین ساجد، ڈپٹی سیکرٹری جنرل راجہ پرویز اختر، سٹی صدر راجہ عبدالمجید، جنرل سیکرٹری راجہ عمران اور دیگر عہدیداران پیپلز یونٹی کی ٹیم کے ہمراہ راولپنڈی اسلام آباد اور لاہور کے مختلف پولنگ اسٹیشنز پر موجود رہے جہاں پیپلز یونیٹی کی متوقع جیت کے تناظر میں سارا دن جشن کا سماں رہا۔ پیپلز یونٹی کی کامیابی کا اعلان ہوتے ہی ایئرپورٹس جیئے بھٹو اور وزیراعظم بلاول کے نعروں سے گونج اٹھے مزدور راہنماؤں، کارکنوں اور ملازمین نے ایک دوسرے کو مبارک باد دی اور نومنتخب عہدیداران کو پھولوں کے ہار پہنائے۔
