اسلام آباد(آئی ایم ایم) اسلام آباد چیمبر آف کامرس اینڈ انڈسٹری (آئی سی سی آئی) کے صدر ناصر منصور قریشی سے شیڈونگ کیروئی گروپ کے ایک اعلیٰ سطحی وفد نے ملاقات کی اور دونوں ممالک کے درمیان بڑھتے ہوئے اقتصادی تعلقات پر تبادلہ خیالات کیا۔ وفد کی قیادت شانڈونگ کیروئی گروپ کے نائب صدر وو شیاؤگوئی اور تابانی گروپ کے ایگزیکٹو ڈائریکٹر حاتم یعقوب تابانی نے کی.یہ امر قابل ذکر ہے کہ شانڈونگ کیروئی گروپ ایک سرکردہ چینی ادارہ ہے جسے تیل اور گیس کی صنعت میں سرمایہ کاری گروپ کے طور پر جانا جاتا ہے۔
صدر ناصر قریشی نے اس بات پر زور دیا کہ دونوں ممالک پائیدار ترقی کا مشترکہ وژن رکھتے ہیں اور یہ کہ توانائی تعاون کے لیے ایک اہم شعبہ ثابت ہو سکتا ہے جس سے نہ صرف پاکستان کو فائدہ پہنچے گا بلکہ دونوں ممالک کی ترقی میں بھی مدد ملے گی۔ میٹنگ میں شیڈونگ کیروئی گروپ اور تابانی گلوبل کی جانب سے گزشتہ 15 سالوں میں پاکستان کے توانائی کے بنیادی ڈھانچے میں کی گئی نمایاں پیش رفت پر بھی تبادلہ خیالات کیا گیا۔
صدر قریشی نے اہم مسائل جیسے کہ توانائی، گیس کے وسائل کو محفوظ بنانے اور پاکستان میں گیس کی بڑھتی ہوئی کمی سے نمٹنے کی اہمیت کو اجاگر کیا.صدر ناصر قریشی نے مجوزہ مشترکہ منصوبوں کے لیے اپنی مکمل حمایت کا اظہار کیا اور پاکستان میں سرمایہ کاری کے اہداف کو حاصل کرنے میں مدد کے لیے ضروری رہنمائی کا اعادہ کیا۔
وفد نے توانائی کے شعبے کو مضبوط بنانے اور پاکستان کی وسیع تر صنعتی ترقی میں کردار ادا کرنے پر توجہ مرکوز کرتے ہوئے تعاون اور باہمی دلچسپی کے مختلف ممکنہ شعبوں کو تلاش کرنے کے لیے پاکستان میں بڑے پیمانے پر سرمایہ کاری کے اپنے منصوبوں کا اشتراک کیا۔
شانڈونگ کیروئی گروپ کے نائب صدر وو شیاؤگوئی نے بتایا کہ ان کی کمپنی پاکستان بھر کے کئی شہروں میں دفاتر قائم کرنے کی خواہشمند ہے اور یہ پاکستانی افرادی قوت کو تربیت بھی فراہم کرے گی تاکہ اس بات کو یقینی بنایا جا سکے کہ مقامی ہنرمند اس کے کاموں میں معاونت کے لیے ضروری مہارتوں سے لیس ہوں۔ انہوں نے آئی سی سی آئی سے ویزا حاصل کرنے، متعلقہ حکام کے ساتھ ملاقاتوں کا اہتمام اور پاکستان میں کام کرنے والی اپنی ٹیموں کی سیکیورٹی کو یقینی بنانے جیسے عمل کو آسان بنانے میں مدد کی بھی درخواست کی۔
آئی سی سی آئی کے سابق صدر میاں اکرم فرید نے اس دورے کو دونوں دوست ممالک کے درمیان دوطرفہ کاروباری تعلقات کو مزید مضبوط بنانے کی جانب ایک اہم قدم قرار دیا۔ انہوں نے پاکستان اور چین کے درمیان گہرے تعاون کو فروغ دینے میں اس طرح کے دوروں کی اہمیت پر زور دیا۔
آئی سی سی آئی کے صدر کے خصوصی مشیر نعیم صدیقی نے دورہ کرنے والے وفد کو آئی سی سی آئی کے مستقبل کے اقدامات سے آگاہ کیا جن کا مقصد پاکستان میں کاروبار کرنے میں آسانی کو بہتر بنانا ہے۔ انہوں نے کاروباری ماحول کو مزید سازگار بنانے کے لیے متعارف کرائے جانے والے مختلف اقدامات پر روشنی ڈالی۔آئی سی سی آئی کے ایگزیکٹو ممبران محمد وسیم چوہدری اور راجہ نوید ستی نے موجودہ دوطرفہ تعلقات کو مزید فروغ دینے اور پاکستان اور چین کے درمیان وسیع تر تعاون کو فروغ دینے کے طریقوں پر تبادلہ خیال کیا۔
