اسلام آباد(آئی ایم ایم)عمان کے سفیر، جناب فہد سلیمان خلف الخروسی، نے گورنر خیبر پختونخوا سے گورنر ہاؤس اسلام آباد میں ملاقات کی۔ اس ملاقات میں پشاور میں امن و امان کی صورتحال اور عمان اور پاکستان کے درمیان موجود قریبی تعلقات کو مزید مستحکم کرنے کے امکانات پر تبادلہ خیال کیا گیا۔
اس موقع پر عمان کے سفیر نے پاکستان میں اپنے تجربات کا ذکر کرتے ہوئے کہا، میں گزشتہ دو سال سے پاکستان میں خدمات انجام دے رہا ہوں اور یہ میرے لیے ایک شاندار تجربہ رہا ہے۔ عمان اور پاکستان کے تعلقات ہمیشہ بہترین رہے ہیں، اور ہم ان تعلقات کو مزید مضبوط بنانے کے مواقع تلاش کر رہے ہیں۔
انہوں نے مزید کہا کہ عمان میں بلوچ برادری کے افراد بڑی تعداد میں مقیم ہیں، جو دونوں ممالک کے ثقافتی اور تاریخی تعلقات کی عکاسی کرتے ہیں۔ انہوں نے پاکستان کے مختلف شہروں کا ذکر کرتے ہوئے کہا، “کراچی پاکستان کا مالیاتی مرکز ہے، اسلام آباد وفاقی دارالحکومت ہے، اور لاہور اپنی تاریخی وراثت کے لیے مشہور ہے۔
گورنر خیبر پختونخوا نے عمان کے سفیر کی آمد پر ان کا شکریہ ادا کیا اور کہا، “میرے ایک عزیز نے عمان کا حالیہ دورہ کیا اور وہاں کی خوبصورتی اور مہمان نوازی کی بہت تعریف کی, عمان کو اپنی ویزا پالیسی کو مزید آسان اور مثبت بنانا چاہیے تاکہ دونوں ممالک کے درمیان تعلقات کو مزید فروغ ملے۔
عمان کے سفیر نے پاکستان میں جاری عمانی منصوبوں کی حمایت کا اعادہ کرتے ہوئے کہا، ہم پاکستان میں اپنے تمام منصوبوں کو مثبت انداز میں آگے بڑھانے کے لیے پرعزم ہیں۔ ہم جلد عمانی سفارت خانے میں مزید ملاقات کریں گے اور نئے خیالات پر تبادلہ خیال کریں گے۔
ملاقات کے اختتام پر گورنر خیبر پختونخوا نے عمان کے سفیر کو اعزازی شیلڈ اور خیبر پختونخوا کی ثقافتی چادر پیش کی، جبکہ عمان کے سفیر نے گورنر کو عمان کا روایتی حلوہ اور تحائف پیش کیے۔ عمان کے سفیر نے گورنر کو عمان کے دورے کی دعوت دیتے ہوئے کہا، “ہمیں آپ کو عمان میں خوش آمدید کہتے ہوئے خوشی ہوگی، جہاں آپ کو گھر جیسا محسوس ہوگا۔
