اسلام آباد(نیوز ڈیسک) الیکشن کمیشن نے عام انتخابات کیلئے کاغذات نامزدگی مسترد یا منظور ہونے کا ڈیٹا جاری کر دیا۔

الیکشن کمیشن کے مطابق ملک بھر میں قومی اور صوبائی اسمبلیوں کی نشستوں پر 3 ہزار 240 امیدواروں کے کاغذات مسترد کیے گئے، قومی اسمبلی کے 1 ہزار 24 اور صوبائی اسمبلیوں کے 2 ہزار 216 امیدواروں کےکاغذات رد کیے گئے۔

ای سی پی حکام نے بتایا ہے کہ امیدواروں کے کاغذات مسترد ہونے کے بعد 22 ہزار 711 امیدوار میدان میں رہ گئے ہیں، ملک بھر سے 25 ہزار 951 امیدواروں نے کاغذات نامزدگی جمع کرائے تھے۔

پنجاب سے قومی اسمبلی کے 521،اسلام آباد کے 93، سندھ کے 166 امیدواروں کے کاغذات مسترد ہوئے، خیبرپختونخوا سے قومی اسمبلی کی نشستوں پر 152، بلوچستان سے 92 سیٹوں پر امیدواروں کے کاغذات رد ہوئے۔

پنجاب اسمبلی سے 943، سندھ اسمبلی سے 520، خیبرپختونخوا اسمبلی سے 367 جبکہ بلوچستان اسمبلی سے 386امیدواروں کے کاغذات مسترد ہوئے۔

مزید پڑھیں: پی ٹی آئی انتخابی نشان کیس: الیکشن کمیشن نے پشاور ہائیکورٹ میں نظر ثانی اپیل دائر کردی

الیکشن کمیشن کی جانب سے مزید کہا گیا ہے کہ قومی اور صوبائی اسمبلیوں کی جنرل نشستوں پر 252 خواتین کے کاغذات مسترد ہوئے، ساڑھے 12 فیصد سے زائد امیدواروں کے کاغذات کو رد کیا گیا۔