لاہور: مسلم لیگ (ن) کی ترجمان مریم اورنگزیب نے کہا ہےکہ دوسری جماعتیں، روئیں یا چیخیں، الیکشن 8 فروری کو ہوں گے۔

لاہور میں میڈیا سے گفتگو کرتے ہوئے مریم اورنگزیب نے کہا کہ سینیٹ میں قرارداد جو کل منظور ہوئی صرف اس کی (ن) لیگ نے مخالفت کی،  پی ٹی آئی والے سازش کے تحت پہلے لاہور ہائیکورٹ گئے اور پھر سینیٹ قرارداد کا ساتھ دیا، یہ لوگ اندر چپ رہتے ہیں اور باہر ڈھول پیٹتے ہیں۔

انہوں نے جیلوں میں بیٹھ کر دھمکیاں دینا بند کرو، ان لوگوں کو پاکستان کے عوام ووٹ نہیں دیں گے، پاکستان کے عوام کو الیکشن چاہئیں، یہ ملک اب 28 مئی والوں کےحوالے ہونے جارہا ہے، 9 مئی والوں پر آرٹیکل 6 لگنا چاہیے، یہ ڈھیل ان کو تب ملی جب 9 مئی کے دہشتگرد کو گڈ ٹو سی یو کہا گیا، 9 مئی کو پورےملک کو جلانےکاکہا ،پھرکہا کارکنوں نے یہ کیا،اب کارکن بھگت رہے ہیں، ان لوگوں کو عوام جانتی ہے۔

مریم اورنگزیب کا کہنا تھا کہ مسلم لیگ (ن) الیکشن کے لیے  پوری طرح تیار ہے، گزشتہ روز پی ٹی آئی نے سینیٹ میں قراردادکی حمایت کی، (ن) لیگ کو الیکشن کمیشن کی ہدایت کے مطابق 8 فروری کو فیصلہ چاہیے، فیصلہ پاکستان کے عوام کو کرنا ہے، ہم اسمبلیوں کے باہر ڈرامے کرنے والے نہیں ہیں۔

انہوں نے مزید کہا کہ دوسری جماعتیں، روئیں یا چیخیں، الیکشن 8 فروری کو ہوں گے، مسلم لیگ (ن) کے جلسوں کا اگلے ہفتے شیڈول طے ہوگا، سینیٹ کی قرارداد کے آگے پیچھے کوئی بھی ہو الیکشن شیڈول پر عمل ہوگا۔

الیکشن سے متعلق سینیٹ کی قرارداد

یاد رہے کہ گزشتہ روز ایوان بالا (سینیٹ) نے ملک میں 8 فروری کو ہونے والے عام انتخابات ملتوی کرانے کی قرارداد کثرت رائے سے منظور کی تھی۔

چیئرمین سینیٹ صادق سنجرانی کی سربراہی میں ہونے والے اجلاس میں قرارداد کی منظوری کے وقت ایوان میں 14 ارکان موجود تھے، خیبرپختونخوا سے آزاد سینیٹر دلاور خان نے الیکشن التوا کی قرارداد پیش کی، بلوچستان عوامی پارٹی (بی اے پی) ارکان اور فاٹا سے رکن ہدایت اللہ نے قرارداد کی حمایت کی۔

مزید پڑھیں: الیکشن ہوں گے ، بلاول بھٹو نے سینیٹ قرارداد مستردکردی

پی ٹی آئی کے سینیٹرگردیپ سنگھ اور پیپلزپارٹی کے رکن بہرہ مند تنگی نے خاموشی اختیار کی جبکہ ایوان میں موجود مسلم لیگ ن کے سینیٹر افنان اللہ نے قرارداد کی مخالفت کی۔