اسلام آباد (سٹاف رپورٹر) آل پاکستان انجمن تاجران اور ٹریڈرز ایکشن کمیٹی اسلام آباد کے صدر اجمل بلوچ کی قیادت میں اسلام آباد بھر کی مارکیٹوں اور مراکز کے عہدیداروں نے انسپکٹر جنرل پولیس ڈاکٹر ناصر اکبر خان سے ملاقات کی اور تاجروں کو درپیش مسائل اور ان کے حل کے لئے بات چیت کی۔ انہوں نے موقع پر بعض احکامات جاری کئے ۔
اس موقع پر اسلام آباد پولیس کے انسپکٹر جزل ڈاکٹر ناصر اکبر خان نےاپنے خیالات کا اظہار کرتے ہوئے کہا کہ ہماری کوشش رہی ہے کہ کوئی بھی احتجاج ہو یا کوئی اور مسئلہ کاروبار بند نہ ہوں جس کے لئے ہمیں کامیابی ملی۔ جگہ جگہ کنٹینر لگا کر راستے بند کرنے کا سلسلہ بھی روک دیا گیا ہے ۔ سیف سٹی پراجیکٹ میں توسیع کر رہے ہیں گزشتہ ایک برس میں تقریباً دو ہزار نئے کیمرے لگائے ہیں ۔ ایف ٹین۔ ایف سیون اور آئی ایٹ مرکز میں آئی سی سی آئی کے تعاون سے کیمرے لگائے گئے ہیں جس کی وجہ سے اِن مارکٹیوں میں جرائم میں کمی آئی ہے ۔ مارکٹیں بھی اس سلسلے میں تعاون کریں اور اپنی اپنی مارکیٹ میں کیمرے لگائیں اور سیف سٹی کے ساتھ منسلک کریں – کار چوری میں واضح کمی ہو چکی ہے۔ موٹرسائیکل چوری بھی ختم کرا رہے ہیں ۔ گداگروں کے خلاف ایکشن لیتے ہیں لیکن ان کو رکھنے کے لئے جگہ ہمارے پاس نہ ہے ۔ مارکیٹیں جگہ مہیا کریں ان پر بھی قابو پایا جا سکتا ہے۔ جیولرز اور موبائل خریدتے وقت احتیاط کی جائے کوشش کریں گے کہ دکانداروں کا نقصان نہ ہو۔
آل پاکستان انجمن تاجراں اور ٹریڈرز ایکشن کمیٹی اسلام آباد کے صدر اجمل بلوچ نے اس موقع پر اپنے خیالات کا اظہار کرتے ہوئے کہا کہ گذشتہ برس اسلام آباد میں سٹریٹ کرائم میں کمی واقع ہوئی ہے۔ مارکیٹوں میں غیر قانونی مقیم غیر ملکیوں کے کاروبار کی سیکورٹی چیکنگ کی جانی چاہیے گذشتہ دنوں جتنے بھی جرائم پیشہ گروہ پکڑے گئے ہیں وہ سب غیر قانونی مقیم تھے ۔ انہوں نے تجویز کیا کہ اسلام آباد کے تمام ایسی پی اپنے اپنے علاقہ کی مارکٹیوں کے عہدیداروں سے ملاقات کریں اور در پیش مسائل کا تدارک کریں ۔ انہوں نے مزید کہا کہ مارکیٹ کی منتخب عہدیداروں کو مصالحتی کمیٹی میں شامل کریں۔ انہوں نے مطالبہ کیا کہ گداگروں سے اسلام آباد کے تاجروں کو نجات دلائی جائے ۔ اس موقع پر ٹریڈرز ایکشن کمیٹی اسلام آباد کے سیکرٹری اور آئی سی سی آئی کے سابق سینئر نائب صدر خالد چو ہدری ۔ ایف ٹین کے صدر احمد خان ۔ یلیو ایریا کے صدر راجہ حسن اختر – سپر مارکیٹ کے جنرل سیکرٹری ثاقب عباسی – جی ٹین کے جنرل سیکرٹری اظہر امین – جی الیون کے صدر نعیم اعوان – چیرمین عاصم عباسی ای الیون کے صدر ظاہر عباسی ۔ ایف ٹین مرکز کے جنرل سیکرٹری نعیم اقبال – آب پارہ کے جزل سیکرٹری اختر عباسی آئی نائن کے صدر صفدر عباسی – جنرل سیکرٹری ولید خالد. آئی ایٹ مرکز کے جزل سیکرٹری زاہد قریشی . فرنیچر ایسوسی ایشن پاکستان کے چیر مین زاہد حسین – ستارہ مارکیٹ کے صدر الطاف شاہ۔ نان بائی ایسوسی ایشن کے سجاد عباسی۔ جی نائن کے صدر محبوب احمد خان ۔ سٹیل مارکیٹ ایشن کے صدر عرفان چوہدری اور دیگر نے بھی اپنے خیالات کا اظہار کیا اور اسلام آباد کے امن وامان کو بہتر بنانے کے لئے تجاویز دیں .
مزید پڑھیں: انتخابات سے متعلق جائزہ، ن لیگی رہنما عقیل انجم سے پارٹی کارکنا ن کی ملاقات
